Kryeministri serb Vuçiq u ka kërkuar biznesmenëve serbë që të vrapojnë e të investojnë në bregdetin shqiptar, pasi sipas tij kjo është detyrë patriotike.
Duke folur në forumin e Nishit, Vuçiq tha:
“Shqiptarët janë njerëz të besës, prandaj duhet punuar me ta.
Dua të inkurajoj njerëzit tanë të shkojnë në Shqipëri, të ndërtojnë objekte turistike, të krijojnë kompani të përbashkëta. Shqiptarët e mbajnë fjalën dhe janë njerëz të mirë dhe të punës. Unë jam ndoshta subjektiv, por dua t’u them se kjo është e mirë për Serbinë dhe punoni mirë me ta. i kuptojmë ndarjet politike, por duhet t’i kthehemi të ardhmes”.
Forumi i Biznesit Shqipëri-Serbi në qytetin e Nishit ka zgjuar kureshtjen e qindra gazetarëve dhe biznesmenëve serbë.
Në një takim më të relaksuar se në Beograd, tani duket se gjuha ka ndryshuar.
Edi Rama, pikërisht në 2-vjetorin e dronit, në Nish ka theksuar se nëse shihet mbrapa, është arritur shumë në marrëdhëniet në mes të dyja vendeve. Ai tha se në atë kohë nuk mund të imagjinohej një takim i tillë.
Forumin e ka hapur Marko Cadez, kryetar i Dhomës së Tregtisë së Serbisë, i cili tha se ka bërë një punë që duhet vazhduar në përmirësimin e marrëdhënieve.
Ai solli si shembull bashkëpunimin e gazetarit të Top Channel Idro Seferi me kameramanin serb Zhivojin dhe që kishin bërë kronikë për sallatën shqiptare që gatuhet vetëm në Nish.
Rama e Vuçiç janë takuar sërish, ndërsa kryeministri shqiptar është takuar edhe me biznismenet. Historia mund të ndryshojë nëse ekonomia merr kryefjalën, duke bërë kthesë në të mirë të zhvillimit.
/tesheshi.com/
