I ndodhur prej ditësh në pozitën e Presidentit të vendit, Aleksandër Vuçiç ka shprehur merak në lidhje me zhvillimet politike në Maqedoni, ngërçin e rëndë në këtë vend, ku dhe ka kërkuar që të merren në konsideratë kërkesat e faktorit shqiptar.
Duke mbajtur pozitën e një të moderuari, gjë që e ndihmoi të kapte dhe kreun e shtetit, Vuçiç ka thënë se nëse nuk zgjidhet çështja shqiptare në Maqedoni, situata mund të agravojë deri te shqiptarët e jugut të Serbisë.
“Nëse kemi shqipëtarë të pakënaqur nga situata në Maqedoni, mundet që problemi nga atje të vijë te ne, në jug të Serbisë. Kjo do kishte pasoja që askush nuk i dëshiron”, tha Vuçiç, teksa foli në një konferencë për shtyp në Beograd me në krah senatorin amerikan, Xhon MekKejn.
“Fola për iniciativën tonë që sa më parë të nis dialogu me shqiptarët në Bruksel dhe se pozitivisht do të ndikojmë në përmisimin e situatës në rajon dhe ndërtimin e mënyrave të mira të marrëdhënieve me Malin e Zi, Maqedoninë dhe Shqipërinë, pasi stabiliteti rajonal është me rëndësi të veçantë për ne”, ka thënë Vuçiç. /tesheshi.com/
