Presidenti serb Aleksandar Vuçiç tha të mërkurën se Serbia nuk mund dhe nuk do ta njohë vendimin e pritur të Dumës Shtetërore të Rusisë për të aneksuar territoret e Ukrainës ku u mbajtën referendumet për t’iu bashkuar Rusisë.
“Ne mbrojmë integritetin tonë territorial dhe është në interesin tonë më të mirë të mbrojmë integritetin territorial të vendeve të njohura ndërkombëtarisht. Kjo është e vetmja gjë që sigurisht nuk mund të ndryshohet, këto janë gjëra që janë të një rëndësie vendimtare për ne”, tha ai, transmeton Tanjug.
Ai shtoi se në atë rast Serbia nuk do të kishte më asnjë qëndrim, jo vetëm kur bëhet fjalë për Kosovën, por edhe për respektin që “meriton sot në bashkësinë ndërkombëtare”.
Ai ka përsëritur se presionet ndërkombëtare ndaj Serbisë në lidhje me Rusinë janë të shumta dhe se pret që ato të shumohen në periudhën e ardhshme.
“Gjithnjë e më pak durim, nervozizmi po shtohet dhe do të angazhohen të gjitha grupet e presionit, si dhe një pjesë e mediave dhe partive politike. Edhe për njërën, edhe për tjetrën”, tha Vuçiç dhe shtoi se mbetet të kujdeset për Serbinë dhe interesat e saj.
“Unë nuk po luftoj për Putin-in apo Biden-in”
Duke folur për presionin ndaj Serbisë, ai tha: “Vuçiç nuk vendos sanksione për shkak të Putin-it? Unë nuk po luftoj për Putin-in ose Biden-in, po luftoj për këta njerëz të mrekullueshëm, për fëmijët dhe prindërit tanë, për të gjithë njerëzit në Serbi”.
“Nuk më interesojnë vërtet liderët e huaj. Unë po shikoj se si në këto momente të vështira Serbia nuk do të jetë nën sulmin e tyre dhe po shikoj se si të mendoj për të nesërmen. Dikush duhet të mendojë se çfarë do të bëjmë nesër, kur të kemi paqe, nëse i kemi mbrojtur me sukses interesat tona apo jo”, tha ai.
Referendumet për bashkimin me Rusinë janë mbajtur në katër rajone të Ukrainës të kontrolluara nga forcat ruse dhe proruse ditët e fundit dhe një pjesë e madhe e komunitetit ndërkombëtar pretendon se nuk do t’i njohë rezultatet.
Sipas liderëve pro-rusë të këtyre rajoneve, qytetarët votuan në referendum për bashkimin me Rusinë, e cila pritet të marrë një vendim zyrtar për aneksimin në ditët në vijim.
Presidenti i Serbisë tha se “për të gjitha çështjet e rëndësishme” do t’u drejtohet qytetarëve të Serbisë më 8 tetor. /tesheshi.com/
