Presidenti serb Aleksandër Vuçiç, deklaroi se Beogradi synon të zgjidhë njëherë e përgjithmonë të gjithë problemet që ka me shqptarët për të jetuar pjesën tjetër të jetës në paqe.
Në një intervistë në televizionin publik serb, Vuçiç tha se “Ne nuk mund t’i kënaqim shqiptarët që të njohim Kosovën, por nga ana tjetër shtoi se edhe ne nuk mund të kënaqemi nga një zgjidhje përfundimtare e çështjes së Kosovës. Ndoshta të dy palët do të mbesin të pakënaqura, por e rëndësishme është të kemi një zgjidhje që siguron paqe dhe braktis konfliktin”.
Duke shpjeguar nismën e tij për një debat kombëtar mbi Kosovën, presidenti serb shtoi se zgjidhja duhet të vijë shpejt.
“Nuk kemi kohë të presim vite. Unë dua që të gjejmë një zgjidhje pasi nëse kjo nuk vjen atëherë do të kemi një konflikt të ngrirë”, tha Vuçiç, i cili i cilësoi hipokritë ata politikanë serbë që kanë kritikuar Listën Serbe e cila ka hyrë në qeveri me Ramush Haradinajn.
Në intervistën e tij për televizionin publik, Vuçic deklaroi se Kosova nuk është e humbur, por duhet të shihnin realitetin në sy, i cili është ai që nuk i pëlqen Beogradit dhe nuk është në favor të tyre.
“Nëse Kosova dhe Metohija do të ishte humbur, unë nuk do të shqetësohesha kaq shumë çdo ditë. Unë për vete kam vuajtur në kurrizin tim presionet dhe kërcënimet më të mëdha dhe më duhet të shkruaj një libër për to për të përshkruar çka ndodhur, sepse ndryshe nga të tjerët nuk dua ta kryejë këtë punë gjithë jetën”, deklaroi Vuçiç i cili ka bërë të ditur se do të largohet nga posti sapo të ketë zgjidhur konfliktin shekullor me shqiptarët..
Duke shpjeguar më shumë presionet ndaj tij, ai tha se “jam kërcënuar se do më mbyllin karrrierën dhe do të më shkatërrojnë, por mesazhi im është se unë po bëj punën time dhe nuk i pranoj presionet”
Ndërkaq presidenti serb ka treguar një zhvillim politik në lidhje me kongresin e ardhshëm të Interpol-it ku do të diskutohet çështja e pranimit të Kosovës.
Vuçiç tregoi se përfaqësuesit kinezë në OKB e kanë siguruar se Pekini nuk do t’u japë viza përfaqësuesve të Kosovës që të marrin pjesë në samitin e Interpolit, pasi Kina nuk e njeh Kosovën. /tesheshi.com/
