Kryeministri i Serbisë, Aleksandër Vuçiç ka diskutuar në Shtëpinë e Bardhë në lidhje me vizitën e tij në Tiranë dhe mesazhet që duhet të vazhdojnë në paqtimin e vendeve të Ballkanit Perëndimor.
Këtë e ka deklaruar vetë Vuçiç pas takimin me Këshilltaren e Presidentit Obama për Sigurinë Kombëtare, Susan Rice.
Kryeministri i Serbisë nuk është takuar dot me zv.Presidentin e SHBA, Joe Biden, siç ishte parashikuar, për shkak të tragjedisë familjare që i ndodhi zotit Biden me vdekjen e të birit.
Pas daljes nga takimi me numrin 3 të Shtëpisë së Bardhë, Vuçiç, tha se diskutuam në lidhje me marrëdhëniet në rajon me Shqipërinë, Kroacinë dhe Bosnjë-Hercegoviën, duke përfshirë Republika Srbska, dhe ka theksuar se është folur gjerësisht rreth vizitave të tij të fundit në Tiranë dhe Sarajëve.
“Unë mbajta qëndrimin e angazhimit të Serbisë që të influencojë për ruajtjen e paqes dhe stabilitetit në rajon, i bindur se kjo është rruga e drejtë për të ecur përpara në Ballkanin Perëndimor”, tha kreu i qeverisë serbe, bën të ditur televizioni B92.
Vuçiç shtoi gjithashti se vendet e Ballkanit Perëndimor përballen me sfida të mëdha në vitin e ardhshëm si pasojë e vështirësisë ekonomike dhe çështjeve të shumta politike me të cilat sfidohet rajoni.
Por ai theksoi se SHBA mbështet përpjekjet për të ruajtur paqen dhe stabilitetin. Ndërkaq siç mësohet administrata amerikane i ka kërkuar Kryeministrit serb që të dënohen përgjegjësit e vrasjes barbare të vëllezërve Bytyçi, tre shqiptarë me shtetësi amerikane që u ekzekutuan kur Lufta në Kosovë kishte mbaruar dhe ende nuk janë gjetur përgjëgjësit. Vuçiç premtoi që do të vihet në levizje nëpërmjet agjencive ligjzbatuese.
Ndërkaq, një tjetër pikë e rëndësishme e takimeve të Vuçiç në Uashington, ishte edhe çështja e mosvarësisë nga gazi rus, apo siç quhet ndryshe nga administrata e Beogradit me delikatesë: “diversifikimi i burimeve të gazit”.
Vetë Vuçiç, sipas Tanjug, ka thënë se “Sebia ka nevojë për të siguruar një furnizim me gaz nga disa burime dhe fola për vizitën time në Azerbaxhan, marrëdhëniet me Rusinë dhe mundësinë e lidhjes me gazësjellësin nga Krk në Kroaci.
“Detyra ime si Kryeministër është që të siguroj mjaftueshëm gaz për vitin 2019 dhe 2020 e për këtë unë po bëj më të mirën”, tha Vuçiç.
/tesheshi.com/
