Presidenti i Serbisë Aleksandër Vuçiç, përmes një konference për media ka thënë se zgjidhje të lehtë dhe të padhembshme për problemin e Kosovës nuk ka.
“Është një nga çështjet kyçe që, për shkak të së ardhmes së Serbisë, të zgjidhim çështjen e Kosovës dhe Metohisë”, tha ai.
Vuçiçi shtoi se Serbia, që nga nënshkrimi i marrëveshjes së Brukselit, ka dhënë gjithçka nga vetja që të jetë partner i besueshëm jo vetëm i shqiptarëve, por edhe i bashkësisë ndërkombëtare.
“Shqiptarët, me pajtim të heshtur, rrjedhimisht pa kundërshtim të qartë të Bashkimit Evropian, nuk kanë zbatuar obligimet, e kjo është formimi i Asociacionit të komunave serb. Do t’ju zbuloj edhe një gjë. Sipas Marrëveshjes së Brukselit, AKS-ja është ajo që propozon komandantin e policisë për veriun. AKS propozon katër kandidatë, nga të cilët Prishtina zgjedh njërin. Ne këtë s’mund ta realizojmë sot sepse nuk e kemi AKS-në, dhe kështu komandantët e policisë na i cakton Prishtina”, tha Vuçiçi.
Sipas tij, Serbisë i kanë mbetur vetëm dy rrugë të mundshme.
“Çka u mbetet serbëve të bëjnë në të ardhmen. Dy rrugë të mundshme. Një rrugë është që, pas më shumë se 1930 ditësh që Prishtina s’e ka përmbushur obligimin e saj, është që serbët të bëjnë atë vetë. Pak kush mund t’ua ndalojë këtë. Nëse do ta bënin serbët këtë, ekziston rreziku i veprimeve të njëanshme të cilat do t’i shërbenin Prishtinës për zgjidhje përfundimtare me veriun. Për këtë arsye këshilla jonë për serbët në KeM është që të përcjellim me kujdes ngjarjet, të zgjedhim veprimet dhe të mos keqësojmë sigurinë e qytetarëve”, tha ai.
Presidenti serb, Aleksandar Vuçiq, ka thënë se vëmendje e veçantë duhet t’i kushtohet zonave të mbrojtura në Kosovë. /tesheshi.com/
