Presidenti serb Aleksandar Vuçiç është takuar në Beograd me këshilltarin e liderit çeçen Ramzan Kadyrov dhe gjatë bisedës me të ka marrë një dhuratë mjaft interesante.
Në fillim të bisedës, këshilltari i Kadyrovit, Turko Daudov, përcolli përshëndetjet nga Çeçenia për Presidentin e Serbisë dhe përmes tij, për mbarë popullin serb.
“Sot është një situatë e vështirë politike në botë, kur Rusia doli në mbrojtje të vlerave shpirtërore, tradicionale dhe familjare, i tregoi Perëndimit refuzimin e ideologjisë që ata imponojnë. Por, përkundër të gjitha vështirësive dhe presionit të jashtëzakonshëm që ushtron Evropa, lidershipi dhe populli i Serbisë jo vetëm që nuk e kundërshtuan, por edhe e mbështetën Federatën Ruse”, tha këshilltari i Kadyrovit, duke përcjellë kështu linjën e politikës proruse, e cila nuk pasqyron qëndrimin historik çeçen ndaj Rusisë.
Ai shtoi më tej: “Në këtë drejtim, Ramzan Kadyrov më kërkoi që personalisht të shpreh respektin tim dhe të përcjell se marrëdhëniet shekullore vëllazërore ndërmjet Rusisë dhe Serbisë kanë treguar edhe një herë fuqinë e tyre”, tha Turko Daudov.
Vuçiç, nga ana e tij tha:
“Prandaj, marrëdhëniet ruso-serbe nuk mund të shkatërrohen nën asnjë presion”.
Në fund të takimit është realizuar një foto interesante ku Daudov i ka dorëzuar Vuçiçit një veshje kombëtare çeçene. /tesheshi.com/
