Presidenti serb Vuçiç tha se vendi i tij nuk do të nënshkruajë marrëveshje për njohje reciproke me Kosovën, pasi kjo u kërkua së fundi në një rezulotë të Parlamentit Europian.
“Bukur, dinjitetshëm dhe me mirësjellje, nuk do të nënshkruajmë. Nuk na shkon mendja, nuk do ta konsiderojmë”, tha Vuçiç për gazetarët, gjatë një vizite në pjesën qendrore të Serbisë.
Parlamenti Evropian miratoi të mërkurën një rezolutë, ku thuhet se marrëveshja përfundimtare ndërmjet Kosovës dhe Serbisë për normalizimin e marrëdhënieve, duhet të “bazohet në njohjen reciproke”.
Kjo është hera e parë që në një dokument zyrtar të një institucioni evropian përmendet “njohja reciproke”.
Vuçiç, po ashtu, e mohoi deklaratën e presidentes së Kosovës, Vjosa Osmani, se një takim i tij me kryeministrin Kurti pritet të zhvillohet së shpejti në Bruksel.
Vuçiç tha se mesazhet që vijnë nga Prishtina për një takim të mundshëm me Kurtin, nuk janë të vërteta. /tesheshi.com/
