Presidenti i Serbisë, Aleksandar Vuçiç, ka bërë të ditur se në seancën e Qeverisë së Serbisë është marrë vendim që Komandës së KFOR-it t’i dorëzohet kërkesë për të kërkuar kthimin e ushtrisë dhe policisë serbe në Kosovë.
Vuçiç tha se kjo kërkesë është në përputhje me Rezolutën 1244.
“Qeveria e Serbisë në seancën e sotme ka marrë vendim që sonte, nesër në mëngjes në vendkalimin administrativ,
t’ia dorëzojë kërkesën tonë komandantit të KFOR-it në formë elektronike, dhe në pajtim me Rezolutën 1244, të kthehet një numër i caktuar, deri në 1000, personel ushtarak dhe policor në Kosovë”, tha Vuçiç për RTS.
Ai ka shtuar se vendimi për dërgimin e kërkesës në KFOR është marrë unanimisht në seancën e qeverisë.
Vuçiç tha se nuk pret që kërkesa të miratohet.
Vuçiç lexoi një pjesë të propozimit franko-gjerman për çështjen e Kosovës, i cili i referohet së drejtës ndërkombëtare, por në lidhje me respektimin e integritetit territorial të të dyja palëve.
Në një pozicion thuhet se Serbia nuk do ta kundërshtojë anëtarësimin e Kosovës në organizatat ndërkombëtare, me fjalë të tjera anëtarësimin e Kosovës në OKB. /tesheshi.com/
