Nuk do ta ndryshoj Kushtetutën, e as në gjysmën e parë të vitit të ardhshëm nuk do të jem kryetar i partisë, tha presidenti i Serbisë, Aleksandar Vuçiq.
Presidenti i Serbisë, Aleksandar Vuçiç, në fjalimin e tij para publikut në konferencën vjetore në Pallatin e Serbisë, tha se ky është mandati i tij i fundit dhe se së shpejti nuk do të jetë në krye të Partisë Progresive Serbe (SNS), si dhe se nuk do ta ndryshojë Kushtetutën e Serbisë.
“Unë nuk kam nevojë, as nuk do të mashtroj apo fsheh fakte nga populli im. Ky është mandati im i fundit presidencial. Nuk do ta ndryshoj Kushtetutën dhe në gjysmën e parë të vitit të ardhshëm nuk do të jem as kryetar i partisë”, ka thënë Vuçiç.
Ndër të tjera, Vuçiç tha se ky vit do të jetë i vështirë dhe shumë më i vështirë se ai i mëparshmi, por se do të jetë vit i “zhvillimit dhe përparimit të mëtejshëm, pavarësisht gjithçkaje”.
“Amerika po bie dhe po i afrohet recesionit, ritmi i rritjes së Kinës po bie, Evropa po i afrohet recesionit, po ashtu edhe ritmi i rritjes së Serbisë po bie, sepse Serbia është pjesë e këtij sistemi”, tha Vuçiç.
“Do të ndikojë edhe tek ne, ne jemi vetëm pjesë e zinxhirit”, shtoi ai.
“Qytetarët duhet të dinë se çfarë i pret”
Ai përcolli se Serbia mund të marrë hua pa vendosjen e sanksioneve kundër Rusisë, anëtarësimit në paktin e NATO-s dhe BE-së, në masën 5.5%, dhe se kjo ende nuk do të bëhet, transmeton Tanjug.
“Ne u kujdesëm për veten dhe siguruam tre për qind të parave nga miqtë tanë arabë, mbajtëm stabilitet të plotë financiar në mënyrë që të kishim burime energjie, çmimet e të cilave nuk e dinim se çfarë do të ishin”, tha ai.
Mirëpo, siç thotë ai, duhet t’u tregojë qytetarëve se çfarë të presin, dhe në këtë kuptim ka kujtuar se si një grua në Rashka e ka pyetur se pse ai gjithmonë jep lajme të këqija.
“I thashë që nuk zgjodhi një klloun, dikë që duhet ta bënte të qeshë, por një burrë që duhet të zgjidhë problemet, jo të të gëzojë. Presidenti është aty për të vënë kurrizin kur askush tjetër nuk do”, tha Vuçiç. /tesheshi.com/
