Kryeministri në largim i Serbisë, Aleksandar Vuçiç, i cili pas pak ditësh merr edhe zyrtarisht postin e presidentit, derisa ka folur për veriun e Kosovës ka bërë një provokim të radhës duke thënë se në marrëveshjen e Brukselit është marrë vendim që të gjithë policët në veri të jenë të kombësisë serbe.
“Asnjë polic çizme shqiptare të mos vë këmbë në veri të Kosovës”, ka provokuar Vuçiç.
Ndaj kësaj deklarate ka reaguar Anton Berisha i AAK-së duke e quajtur manipulues Vuçiçin.
“Pyetja e parë parlamentare që do t’i shtroj kryeministrit të Kosovës z. Ramush Haradinaj, do të jetë sqarimi i marrëveshjeve me Serbinë, e që ka të bëjë deklaratën e kryeministrit të Serbisë, Vuçiç: ‘që të gjithë punonjësit e policisë të jenë të nacionalitetit serb, dhe se asnjë polic shqiptarë të mos vë këmbë në Veri të Kosovës’. Në një shtet europian, siç është Kosova, kjo nuk mund të ndodhë prandaj ose Vuçiç është duke manipuluar ose duhet anuluar një marrëveshje e tillë”, ka shkruar Berisha.
Kujtojmë se Serbia reagoi ashpër pas dërgimit të forcave ROSU në veri në rastin e trenit ilegal, por NATO më pas bëri të qartë se këto forca mund të shkelin veriun pa lejen e KFOR-it./tesheshi.com/
