Presidenti serb Aleksandar Vuçiç nuk ka pritur shumë, por menjëherë ka kërkuar atë që përflitej: rikthimin e autoriteteve të Beogradit në veriun e Kosovës, edhe zyrtarisht, pasi faktikisht ata nuk janë larguar kurrë.
Duke iu drejtuar mediave pas mbledhjes së Këshillit të Sigurimit Kombëtar, Vuçiç tha: “Për shtetin e Serbisë, ky akt është terrorist, dhe sipas atij akti, ne do ta trajtojmë si të tillë atë.
Autorët e këtij akti do të kapen edhe nëse nuk e bëjnë ata që e kanë për detyrë këtë gjë, pra autoritetet e Kosovës, do ta bëjmë ne”, deklaroi Presidenti i Serbisë.
Kreu i Beogradit shtoi se në mbledhjen e Këshillit të Sigurisë Kombëtare është rënë dakord paraprakisht t’I dërgohet një letër autoriteteve të EULEX-it dhe të UNMIK-ut që organet e Republikës së Serbisë marrin pjesë në kryerjen e një hetimi në territorin e Kosovës.
“Sepse ne jemi të bindur se vetëm kështu do të arrijmë në zbulimin e së vërtetës për vrasjen e Oliver Ivanoviçit. Ne do të gjejmë vrasësin. Unë nuk kam autoritetin të flas për momentin në lidhje me njohuritë që kemi. Nuk do të spekuloj, por ka detaje interesante që tregojnë për autorët e mundshëm.
U vra një njeri i cili është një prind, bashkëshort, dhe që sigurisht nuk ishte ai i cili bëri thirrje për konfliktin mes serbëve dhe shqiptarëve. Kushdo që e ka kryer krimin: qoftë serb, shqiptar,apo i huaj,ka sulmuar familjen e Ivanoviç, por edhe serbët në Kosovë dhe Metohisë”, deklaroi Vuçiç.
Ai tha gjithashtu se delegacioni serb në Bruksel ndërpreu bisedimet në kuadër të dialogut, për shkak se është e kotë për të folur, ndërkohë që Kadri Veseli thotë që do të pushtojë Nishin.
/tesheshi.com/
