Presidenti Vuçiç, i cili këto kohë po shfaqet me ndjesi apokaliptike, është shprehur sërish me ankth mbi të ardhmen e afërt, dimrin.
Ai, së bashku me kryeministrin hungarez Viktor Orban dhe kancelarin austriak Karl Nehammer u takuan në Budapest në një samit trepalësh kushtuar politikës së emigrantëve dhe veprimit të përbashkët kundër krimit të organizuar dhe kontrabandës, si dhe situatës së energjisë.
“Sot folëm për të gjitha çështjet e rëndësishme dhe të vështira me të cilat po përballemi. Si për gjendjen energjike ashtu edhe për atë financiare… Të gjithë jemi nën presion. Të gjithë e dimë se sa e vështirë do të jetë të kapërcejmë vjeshtën, dimrin dhe Zoti na ruajt, pranverën. Mendoj se dimrin e ardhshëm do të jetë edhe më keq”, tha Vuçiç, duke mos qenë aspak optimist.
“Qendrat tregtare do të mbyllen në disa vende, sepse kompanitë nuk do të mund të paguajnë për gjithçka”, tha ai, prandaj do të duhet bashkëpunim dhe zgjidhje të përbashkëta nga të gjitha vendet.
Në përgjigje të pyetjes së një gazetari për energjinë, Orban tha se Hungaria është duke punuar me Serbinë për zgjidhje strategjike sa i përket furnizimit me energji.
“Për sa kohë që Hungaria ka gaz, edhe Serbia do ta ketë atë”, tha Orban. /tesheshi.com/
