Aleksandër Vuçiç, ka arritur siç duket të bindë një pjesë të shqiptarëve të Preshevës dhe t’i fusë në qeverinë e re që do të formohet së shpejti.
Një scoop imazhi që i jep kryeministrit të Serbisë aureolën e një njeriu që punon për paqen dhe integrimet europiane.
Për herë të parë në qeverinë e Serbisë, një shqiptar do të jetë ministër.
Siç bën të ditur “B92”, ky është një mesazh i dakorduar edhe me BE-në dhe Shtetet e Bashkuara të Amerikës.
Dhe për këtë Vuçiç është institucional: ka zgjedhur partinë shqiptare që është në Kuvendin e Serbisë, përkatësisht Partia e Aksionit Demokratik e Riza Halimit.
Për televizionin B92 ka qenë një zyrtar i PAD-së, përkatësisht Fatmir Hasani, i cili ka deklaruar se “ne kemi qenë parti parlamentare që prej vitit 90 dhe kemi qenë gjithmonë në opozitë, ndaj dhe na takon dhe është normale që të jemi pjesë e qeverisë”.
Hasani është deputeti deputet i kësaj partie në Parlamentin serb i zgjedhur më 24 prill dhe beson se ai do të shërbejë si “urë e bashkëpunimit”.
“Ne duam të jemi një influencë pozitive për stabilitetin dhe bashkëpunimin ndërmjet Serbisë, Shqipërisë dhe Kosovës. Synimi ynë është gjithashtu që të influencojmë në zhvillimin e Preshevës, Medvegjës dhe Bujanocit”, tha Hasani për tre komunat shqiptare të Luginës që ndodhen në jug të Serbisë.
Duke folur për televizionin e njohur si opozitar ndaj qarqeve nacionaliste serbe, zyrtari i PAD-së theksoi se kjo forcë politike do të angazhohet që nga brenda dhe me negociata që do të ndryshojë situatën aktuale në terren.
Ndërkaq, i pyetur në lidhje me një portofol të posaçëm ministror apo një karrige sekretari shteti, Hasani deklaroi se “asgjë nuk është vendosur ende në mënyrë preçize”.
Partia e Aksionit Demokratik, e drejtuar nga Riza është e vetmja parti në Luginën e Preshevës që mori pjesë në zgjedhjet parlamentare të Serbisë, të cilat u bojkotuan nga të gjitha partitë e tjera.
“Ata i bojkotuan zgjedhjet, por unë jam i aftë të bashkëpunoj me të gjitha partitë shqiptare dhe të përfaqësoj pozicionet e tyre në Parlamentin e Serbisë”, tha Hasani.
Dy ditë më parë, Riza Halimi është takuar edhe me Presidentin e Serbisë, Tomislav Nikoliç, si pjesë e bisedimeve për krijimin e qeverisë së re.
Në lidhje me formimin e qeverisë, Halimi u tha gazetarëve se “qëndrimi ynë ka ndryshuar pasi duke hyrë në qeveri ne mund t’i zgjidhim më mirë problemet e shqiptarëve të Luginës”./tesheshi.com/
