Ndërsa Kosova ka kushtëzuar vazhdimin e dialogut në Bruksel me përfshirjen direkte edhe të SHBA-së, presidenti serb Vuçiç ka thënë se dialogu do të vazhdojë si do Serbia duke paralajmëruar se nëse përfshihet Amerika do futet në lojë edhe Rusia.
“E vazhdojmë dialogun, por jo siç ju e dëshironi, sepse pyetet edhe Serbia. Do të jetë i atillë siç thotë Serbia. Jo pse dëshiron kështu, por sepse ofron kompromis”, ka thënë Vuçiç, në një intervistë për televizionin serb “Pink”.
“Dëshironi të fusni një lojtar shtesë? Nëse dëshironi dikë që e ka njohur Kosovën, Serbia kërkon dikë që nuk e ka bërë këtë, e kjo është Rusia”, ka thënë ai, dhe ka shtuar se për çështje ka biseduar edhe me presidentin e Rusisë, Vladimir Putin, dhe ka marrë përkrahjen e tij.
Ai ka përsëritur se Serbia nuk do të kërkojë ndryshim të formatit të dialogut, se shkon në dialog në mënyrë objektive dhe neutrale, sa më shumë që të jetë e mundur, sepse gjithsesi është dëmtuar, dhe tha se Serbia nuk duhet të sillet në një situatë që është e pamundur.
Presidenti serb tha se është BE-ja ajo që i drejton bisedimet, duke shtuar se për serbët do të ishte më mirë sikur ky dialog të drejtohej nga OKB. /tesheshi.com/
