Presidenti serb Aleksandër Vuçiç ka dhënë një sinjal tjetër të fuqishëm se kërkon të trondisë shërbimin sekret BIA, pas tentativave për atentat që ju bënë kur ishte kryeministër, por edhe implikimet në puçet e Podgoricës dhe Shkupit.
Siç njofton B92, Vuçiç ka refuzuar që të marrë pjesë në takimin ceremonial të BIA-s në Beograd, duke shënuar kështu një luftë të hapur me institucionin më të pushtetshëm dhe të frikshëm në Serbi.
Sebepi zyrtar i këtij bojkoti është moslejimi në takim i disa gazetarëve nga ana e kreut të BIA-s, por realisht bëhet fjalë për një luftë që së shpejti do të shpërthejë.
BIA ka përkujtuar dje përvjetorin e krijimit të saj. Në 17 tetor 1899, ministri i Brendshëm i Mbretërisë së Serbisë firmosi krijimin e Departamentit për Punët Sekrete.
Por ky institucion është totalisht i mbizotëruar nga shërbimi sekret rus dhe të dhënat i kanë mbërritur Vuçiçit nga partnerët e NATO-s.
Ka qenë pikërisht një shërbim perëndimor që ka sinjalizuar armët që ishin rezervuar në një vend të fshehtë pranë banesës ku Vuçiç dhe i vëllai i tij kalojnë fundjavën. Ishte sërish një informacion nga NATO që e sinjalizoi atë për mundësinë e shpërthimit të zyrave të qeverisë dy vjet më parë. Ishte sërish një shërbim perëndimor që e njoftoi Vuçicin që një detashment i BIA-s, së bashku me rusët do bënin grusht shteti në Mal të Zi dhe Vuçiç atëherë kryeministër u distancua.
Madje edhe për rastin e Maqedonisë, ishte Vuçiç që e shkriu shërbimin diplomatik serb në Shkup që rezultoi i përfshirë në trazirat e prillit ku u rrah Zoran Zaev dhe Zijadin Sela.
A do të mundet dot Vuçiç që ta shkrijë BIA-n siç tentoi Zoran Xhinxhiç në 2003-shin por u vra?
Këtë herë, presidenti serb i ka duart më të lira, pasi edhe kryeministren e ka njeri të besuar… /tesheshi.com/
