Presidenti serb Aleksandar Vuçiç tha sot, më 4 prill, se po udhëton për në New York, ku do të përpiqet të parandalojë miratimin e rezolutës për gjenocidin në Srebrenicë në Kombet e Bashkuara.
“Tashmë po planifikoj të shkoj atje më 21 prill dhe të qëndroj për gjashtë, shtatë, tetë ditë, për të biseduar me sa më shumë përfaqësues”, tha Vuçiç.
Vuçiç e cilësoi miratimin e kësaj rezolute si “të padrejtë”.
“Ky miratim i rezolutës është kaq i padrejtë, sepse tashmë është miratuar një rezolutë e përgjithshme për gjenocidin, dhe individualisht është e padrejtë të shkohet më tej”.
Ai i tha Qeverisë së Serbisë se pret që ata të luftojnë dhe shtoi se do të bisedojë me përfaqësuesit e shteteve të veçanta.
Kujtojmë se në rezolutën e përgatitur nga Misioni i Bosnje-Hercegovinës në Kombet e Bashkuara të kryesuar nga ambasadori Zlatko Lagumxhija, të gjitha vendet e botës u kërkohet të zhvillojnë programe për Srebrenicën, si dhe të dënojnë çdo “glorifikim të personave të dënuar për krimet e luftës kundër njerëzimit dhe gjenocidin në Srebrenicë”.
Asamblesë së Përgjithshme të OKB-së do t’i kërkohet të caktojë 11 korrikun si Ditën Ndërkombëtare të Kujtimit dhe Përkujtimit të Gjenocidit të Srebrenicës dhe që kjo datë të përkujtohet në të gjitha vendet çdo vit.
Gjithashtu, dokumenti kërkon që çdo mohim i tij të dënohet pa rezerva. U theksua se Sekretarit të Përgjithshëm të OKB-së i kërkohet të krijojë një program informativ të quajtur “Gjenocidi në Srebrenicë dhe OKB”. /tesheshi.com/
