Presidenti i Serbisë, Aleksandar Vuçiç, tha se do të shkojë në Moskë për Paradën e 9 Majit, ku siç theksoi, me krenari do ta përfaqësojë Serbinë në 80-vjetorin e fitores mbi fashizmin.
“Kam thënë tetë muaj më parë se do të shkoj në Moskë. Do të shkoj në Moskë. Ndoshta do të jem i vetmi që do të shkoj në Moskë, sepse organizatat e tjera nuk mund të rrezikojnë. Unë nuk dua që qeveria e Đuro Macut të paguajë çmimin. Dua që ai të ketë mundësinë të punojë me BE-në siç duhet dhe askush të mos i thotë asgjë. Nuk ka gjasa që ushtria të shkojë nën sanksione të ndryshme,” tha ai.
Në këtë mënyrë, ai konfirmoi përfundimisht se do të shkonte në kryeqytetin rus, pavarësisht paralajmërimit të Bashkimit Evropian “që shtetet anëtare dhe vendet kandidate nuk duhet të jenë në Paradë për shkak të agresionit rus kundër Ukrainës dhe se mund të përballen me sanksione nëse nuk i binden udhëzimeve të Brukselit zyrtar”.
Takimi me Putinin
Vuçiç po ashtu deklaroi se do të ketë më shumë punë për të bërë në Moskë, përkatësisht se do të bisedojë me presidentin rus Vladimir Putin për një marrëveshje të re të gazit.
“Duhet të nënshkruajmë marrëveshjen e gazit deri më 30 maj. Duhet të zgjidhim çështjen e kompanisë së naftës (NIS). Duhet të diskutojmë të gjitha temat e tjera,” tha Vuçiç.
Ai shtoi se beson se para se të niset për në Rusi do të ketë mundësinë të bisedojë me shumë nga lidershipi i Partisë Republikane Amerikane dhe SHBA-së, si dhe se ndërkohë do të bisedojë edhe me liderët e BE-së, duke thënë se Komisionerja për Zgjerimin dhe Marrëdhëniet e Fqinjësisë Marta Kos do të arrijë në Beograd në fund të prillit.
Këtë javë, kreu i Kishës Ortodokse Serbe, Patriarku Porfirije, po viziton gjithashtu Moskën. /tesheshi.com/
