Presidenti serb Aleksandar Vuçiç, në një fjalim të jashtëzakonshëm me rastin e vrasjes së një polici në Kosovë ka thënë se një grup serbësh nga veriu i Kosovës rreth orës 2 të natës së sotme kanë vendosur barrikada pranë Banjskës. Ai e mbajti fjalimin e tij në prime time, si zakonisht, me pauza dramatike.
“Më pas erdhi policia e Kosovës për të hequr barrikadat, pasoi një konflikt në të cilin u vra një polic”, tha Vuçiç.
“Çfarë ka ndodhur në të vërtetë? Edhe pse kemi folur shumë herë për këtë, edhe pse kam paralajmëruar se kjo mund të ndodhë, pak njerëz duan të dëgjojnë. Serbët nga Kosova u revoltuan duke mos dashur të vuajnë terrorin e Kurtit”, tha Vuçiç, gjithnjë duke u vetëviktimizuar, pas sqaruar se ç’lloj terrori po ushtrohet mbi serbët dhe kush janë viktimat e këtij terrori të pretenduar.
Ai shtoi se sulmuesit janë rrethuar plotësisht për 10 minuta dhe se ndaj tyre është kryer një “sulm brutal”, edhe pse flet për sulmuesit që vranë një polic kosovar dhe pushtuan një manastir, duke qenë haptazi struktura kriminale.
“Me atë shpejtësi i rrethuan serbët për të vërtetuar se serbët janë fajtorët e vetëm”, tha Vuçiç me një të qeshur cinike.
Ai shtoi se “kisha dhe Serbia nuk kanë asnjë lidhje me sulmin”.
“Fajtori i vetëm është Albin Kurti. Ai dëshiron një konflikt, ai nuk ka dëshirë tjetër. Dëshira e tij e jetës është të na fusë në një konflikt me NATO-n. Kjo është dëshira e tij e vetme”, tha Vuçiç në mënyrë dramatike.
Ai iu referua akuzave se pas sulmit ndaj policisë së Kosovës qëndron Serbia.
Më pas foli aty ku e ka synimin final, duke i bërë bërë thirrje bashkësisë ndërkombëtare që të formojë një “bashkësi të komunave serbe” sepse kjo është “e vetmja mënyrë për të shmangur më shumë konflikte”.
Ai ka folur sërish se si të gjithë kanë komplotuar kundër Serbisë dhe ka thënë se për komunitetin ndërkombëtar “hipokrizia është emërtim i butë” dhe se po i detyrojnë ta njohin Kosovën.
“Ne kurrë nuk do ta njohim Kosovën e pavarur, ju mund të na vrisni të gjithëve. Nuk do ta njohim kurrë krijimin e çuditshëm që bëtë me bombardime, me të gjitha gënjeshtra të mundshme. Ne gjithmonë do të flasim dhe do ta harrojmë njohjen e Kosovës”, tha Vuçiç, ish-i afërt i Millosheviçit gjatë kohës së krimeve në Kosovë. /tesheshi.com/
