Pas vendimit të Gjykatës së Hagës që e dënoi përjetësisht Ratko Mlladiçin, presidenti serb, Aleksandër Vuçiç, në një deklaratë para kombit u ka kërkuar bashkombasve të tij të mos ulin kokat para botës.
“Mos ulni kokën para askujt, vetëm shikoni përpara, se si ne dhe fëmijët tanë do ta jetojnë këtë të ardhme, do të ruajmë paqen dhe stabilitetin në rajon. Mos nxirrni lot për të kaluarën, por buzëqeshni për të ardhmen”, tha Vuçiç.
Presidenti serb, megjithatë ka bërë të ditur se nuk e ka ndjekur seancën e Hagës por vetëm ka marrë vesh vendimin.
“Serbia ka respektuar gjithmonë viktimat e popojve të tjerë dhe nuk jam i sigurtë se edhe të tjerët e kanë bërë këtë. Detyra jonë është që të mos harrojmë të kaluarën por të shikojmë dhe jetojmë të ardhmen”, tha ai.
Presidenti i Serbisë, i cili në të shkuarën ka qenë një përkrahës i flaktë i Ratko Mlladiçit, tentoi që të mos jetë në pozicion mbrojtës, kur u bëri thirrje liderëve të rajonit. “Ka një mesazh nga vendimi i sotëm: mos u përqëndroni në trishtimin e së shkuarës, por të punojmë për të ndërtuar një të ardhme më të mirë për të gjithë”, tha Vuçiç.
/tesheshi.com/
