Presidenti serb Vuçicc tha se me marrëveshjen mes Beogradit dhe Prishtinës për heqjen dorë nga lëshimi i dokumenteve hyrëse-dalëse për qytetarët e dy vendeve, Serbia ka arritur të marrë më të mirën e mundshme.
Vuçiç ka theksuar se ka arritur një marrëveshje gojore me kryeministrin e Kosovës, Albin Kurti, sipas së cilës Serbia do të anulojë lëshimin e dokumenteve të hyrjes për personat që kanë dokumente identiteti të Kosovës dhe Kosova nuk do të diktojë dokumente të tilla për ata që kanë letërnjoftime serbe.
“Nuk kemi nënshkruar asgjë. Shqiptarët insistojnë në marrëveshjen e vitit 2011, dhe të fshihet marrëveshja nga Brukseli në vitin 2013 dhe të mos flasim për Bashkimin e Komunave Serbe”, tha Vuçiç pas stërvitjes së përbashkët të pjesëtarëve të policisë dhe ushtrisë.
Sipas marrëveshjes së arritur, banorët e Kosovës dhe Serbisë do të mund të udhëtojnë lirisht duke përdorur letërnjoftime.
“Ne luftuam për të korrigjuar diçka dhe mendoj se ia dolëm. Nuk mund të qëndrojmë për ‘Ballkanin e Hapur’ ndërkohë që mbyllim të gjithë kufijtë. Mendoj se ajo që është arritur është e mirë për ne”, tha Vuçiç. /tesheshi.com/
