Kryeministri Haradinaj ka absolutisht të drejtë kur thotë se Shtetet e Bashkuara, çfarëdo që të ndodhë, do të jenë në anën e tyre, pa marrë parasysh se Kosova ka shkelur të drejtën ndërkombëtare – tha presidenti serb Vuçiç, si reagim ndaj deklarimeve të shefit të qeverisë së Prishtinës se pas Kosovës qëndrojnë SHBA.
Ai vuri në dukje se ka qenë prej kohësh e qartë se Shtetet e Bashkuara qëndrojnë prapa shqiptarëve dhe se ata kurrë nuk kanë bërë asgjë për veten e tyre.
“Nuk është sekret i madh. Ata kanë më shumë aleatë në Europë”, tha Vuçiç, duke bërë thirrje më pas të karakterit patriotiko-social për t’u shtuar si popull.
“Pra, ne kemi nevojë për t’u shndërruar në fabrikë lindjesh për të fituar të ardhmen”, tha presidenti serb.
“Të shtohen njerëzit dhe të kenë më shumë fëmijë”, shtoi ai, duke kaluar më pas tea jo për të cilën ka folur Haradinaj.
“Për të fituar ndaj ushtrisë amerikane, as mos mendoni për këtë. Ne e provuam atë një herë dhe nuk ia arritëm”.
“Serbia u sulmua dhe ne e dimë se çfarë mendojmë për agresionin. Le t’i ruajmë njerëzit, të kemi më shumë foshnja”, theksoi Vuçiç.
Ai shtoi se Serbia duhet të shmangë ndonjë problem me SHBA.
“Është provuar shumë herë. Prandaj duhet ruajtur paqja, të ruhen njerëzit tanë dhe interesat vitale. Të qënurit arrogant ndaj amerikanëve, do të ishte qesharake. Ne jemi shumë të vegjël”, tha Vuçiç.
Ai theksoi se nuk ka dyshim se Haradinaj ka të drejtë që Shtetet e Bashkuara janë në anën e tyre, sepse ata kanë njohur një Kosovë të pavarur.
Megjithatë, Vuçiç tha se nuk ishte i kënaqur me deklaratën e bërë nga ambasadori i SHBA në Kosovë, Philip Kosnett lidhur me formimin e Ushtrisë së Kosovës.
“Ata sillen me gjuhën e forcës e jo me të drejtën ndërkombëtare”, tha Vuçiç, referuar politikës amerikane ndaj raporteve Serbi – Kosovë. /tesheshi.com/
