Në një prononcim për median në tapetin e kuq, pasi u mirëprit nga kryeministri Rama, presidenti Vuçiç shpjegoi se pse anulloi vendimin për të bojkotuar Samitin e Tiranës.
“Pati një sërë çështjesh të ndryshme, reagime zyrtare për çështjen e Kosovës, dialogut, kjo ishte arsyeja kryesore, por në fund pas konsultimeve vendosëm të vijmë dhe të diskutojmë të gjitha çështjet. Mbetemi të përkushtuar ndaj dialogut dhe procesit të negociatave me BE. Mbetemi të përkushtuar për rrugën ndaj BE, por në të njëjtën kohë do të na duhet të mbrojmë të drejtat tona kushtetuese”, tha ai, duke qëndruar gjithë “hundë e buzë”, i murrëtyer, pa qeshur aspak.
Ai tha gjithashtu se vendosi për të qenë në Samit në Tiranë dhe për t’i sqaruar sy më sy BE qëndrimi serb lidhur me Rusinë.
“Jemi drejt rrugëtimit europian dhe kështu do të mbetet”, tha ai. /tesheshi.com/
