Nga Ohri, presidenti serb Aleksandër Vuçiç deklaroi se nisma “Ballkani i Hapur” është një iniciativë e cila nuk mund të ndalet.
Ai u shpreh se do të krijohen grupe pune për samitin e ardhshëm, për të cilën propozoi që të mbahet në Serbi, teksa ftoi edhe përfaqësuesit e Kosovës, Malit të Zi dhe Bosnjes.
“Kjo është iniciativë e njerëzve që jetojnë në Ballkan dhe kjo është diçka që nuk mund të ndalet. Çdo vit të ketë sa më shumë udhëtarë në vendet e Ballkanit. Do të formohen grupe pune për takimin e ardhshëm, që propozoj të jetë në Serbinë jugore, që do të kujdesen që të tejkalojmë vështirësitë e furnizimit me ushqim, për furnizimet me energji elektrike, se si të ndihmojmë njëri-tjetrin. Janë të mirëseardhur edhe përfaqësuesit e Kosovës, Malit të Zi dhe Bosnje Hercegovinës”, tha presidenti serb.
Sipas Vuçiç, vendet e Ballkanit Perëndimor nuk kanë probleme bilaterale me njëra-tjetrën dhe Serbia nuk ka asnjë kërkesë, por kërkon bashkëpunim rajonal.
Ai më tej ceku fluksin serb drejt bregdetit shqiptar.
“Duhet të diskutojmë se çfarë mund të bëjmë për turizmin. Njerëzit nga Serbia po shkojnë në bregdetin shqiptar. Ne t’i ftojmë miqtë tanë që të vizitojnë Serbinë tonë të bukur. Jam krenar që nga iniciativa që e bëmë, këtë nuk mund të ndalojë askush”, tha ai. /tesheshi.com/
