Kryeministri serb Aleksandër Vuçiç ka emëruar në postin e ministrit të Mbrojtjes, profesorin e Ekonomisë, Dushan Vujoviç, i cila duket një lëvizje e ekuilibruar për ta mbajtur mirë si me amerikanët.
Vujoviç deri tani ka mbajtur postin e ministrit të Ekonomisë, është i pavarur dhe nuk i përket partisë së Nikoliçit dhe Vuçiçit, por në cv-në e tij ai ka eksperiencë në organizmat ndërkombëtare, po ashtu ka puanuar si këshilltar i USAID-it, çka i jep një “licence” proamerikane.
Mediat serbe e kanë trajtuar këtë zëvendësim si një lëvizje të moderuar dhe jo duke shkuar drejt radikalizmit me emërimin e një filorusi në ministrinë që pritet të blejë një sasi të konsiderueshme raketash nga Moska.
Vujoviç është doktoruar në Universitetin Berkeley në Kaliforni dhe njeh mirë si anglishten ashtu dhe rusishten. Gjatë një eksperience në Bankën Botërore, Vujoviç ka punuar për të trajnuar vendet në tranzicion si ish-Bashkimin Sovjetik, Kinën dhe Vietnamin.
Ai ka qenë për një kohë shefi i ekonomistëve të BB-së për Europën dhe Azinë Qendrore.
Ndërkaq, nga 2011 ka punuar për USAID-in si këshilltar.
Emërimi i tij ishte një përplasje mes presidentit Nikoliç dhe kryeministrit Vuçiç për të vendosur njerëz të influencave të tyre. Megjithatë, beteja pritet të zhvillohet në Parlament.
Zërat e parë duket se do të sjellin një përplasje mes aleatëve në qeveri. Konkretisht nga partia e Ivica Daçiçit, që e shikon Vujoviçin si proamerikan. Shumë nga mediat e Beogradit theksojnë se me këtë lëvizje mund të vihet në dyshim blerja e armëve ruse, pasi ministri aktual i mbrojtjes cilësohet si një njeri i afërt i SHBA-së. /tesheshi.com/
