Presidenti serb, Aleksandër Vuçiç, ka thënë për mediat serbe se raportimet në Kosovë për helmim votash nuk i kishin shënjestër serbët, por të ndryshohej përbërja në parlament, e kështu të fitonte më shumë partia nga vjen Osmani sesa ajo e Kurtit.
Ndaj kësaj deklarate ka reaguar kandidatja për kryeministre nga LDK, Vjosa Osmani përmes një shkrimi në rrjetin social Facebook.
Osmani ka thënë se kjo është propagandë profesionale e Vuçiqit.
“Jo rastësisht Aleksandar Vuçiç ishte ministër i propagandës në kohën e Millosheviçit. Pikërisht këtë, propagandën pra, e bënë më së miri. Kështu, për fat të keq, ka arritur të mashtrojë disa diplomatë anekënd botës, të cilët i besojnë lotëve të tij të krokodilit dhe aktrimit të tij dramatik sa herë flitet për Kosovën. Por, askush në Kosovë nuk duhet të bie pre e konspiracioneve të Vuçiçit”, tha ajo.
“LDK nuk i punon askujt pas shpine e aq më pak nëpërmjet lojërave që janë produkt i mendjeve konspiracioniste siç është ajo e Vuçiçit. Të gjithë ne në LDK jemi të angazhuar që Qeveria e ardhshme LDK-VV të krijohet si partneritet mes të barabartëve dhe si marrëveshje ku mirëbesimi është alfa dhe omega e bashkëpunimit tone”, thotë Osmani.
Osmani thotë se Vuçiç dhe disa të tjerë që po përpiqen e po investojnë në prishjen e një partneriteti të tillë “do të përfundojnë duarthatë”.
Ajo ka përfunduar duke thënë se Lidhja Demokratike e Kosovës e ka ndërtuar dhe ka insistuar për parimin në bazë të së cilit kushdo që i fiton zgjedhjet edhe e propozon Kryeministrin. /tesheshi.com/
