Presidenti serb Aleksandar Vuçiç planifikon të vizitojë Kinën në tetor, ku mund të takohet me presidentin rus Vladimir Putin.
“Deri në fund të vitit pres bisedime serioze dhe të rëndësishme me partnerët tanë shumë, shumë të rëndësishëm. Në tetor do të bëj një vizitë të rëndësishme në Kinë. Pyetja e madhe është se çfarë do të ndodhë atje sepse pritet edhe ardhja e presidentit rus Vladimir Putin”, tha Vuçiç për TV Happy.
Agjencia e Moskës TASS kujton se dhe presidenti i entitetit boshnjak të Republika Srpska, Milorad Dodik, tha se pret të vizitojë Kinën këtë vjeshtë dhe të takohet me Putinin.
Vizita e Putinit në Kinë është planifikuar për në tetor, kur Kina do të presë forumin “Një brez, një rrugë”, tha më herët ndihmësi i tij Yuri Ushakov.
Angazhimi ndaj Evropës
Synimi i Serbisë, sipas Vuçiçit, duhet të vazhdojë të jetë “rruga për në Evropë për një milion arsye dhe mbi të gjitha të jetojë në një demokraci”.
“Serbia nuk dëshiron të jetojë në diktatura, as në regjime despotike, por në demokraci në të cilat askush nuk do të vrasë kundërshtarët politikë apo nuk do të dënojë dikë me 30 apo 40 vjet burg, sepse dikush i tha atij se po drejtonte një politikë të keqe”, tha. Vuçiç.
“Politika jonë duhet të jetë e tillë që të shkojmë dhe të flasim në Bruksel, Berlin, Paris, Romë dhe në të gjitha qendrat – Vjenë, Budapest, Athinë, Sofje, Bukuresht, Zagreb dhe Lubjanë dhe gjithë të tjerat, se si Serbia mund të ecë përpara në Evropë, por nuk duhet të mbyllim sytë ndaj asaj që po ndodh në botë dhe të pretendojmë se nuk kuptojmë”, theksoi ai. /tesheshi.com/
