Në intervistën e dhënë për Tv Pink, presidenti serb Aleksandër Vuçiç ka bërë një pohim kurajoz, por që ka përcjellë dhe pezmin e tij në raport mes asaj çka ndodh me shqiparët e kombin e tij, në lidhje me treguesit e natalitetit.
“Në 70 vjet, shqiptarët do të jenë kombi më i madh në rajon, sepse ata po rriten dhe nuk kanë probleme me politikanët e tyre, të cilët do të thonë ‘mos lindni fëmijë, mos mendoni për të ardhmen, por vetëm për rehati’”.
Ka qenë kjo deklarata e pazakontë e Vuçiçit, që në fakt, ka tentuar të godasë tek ajo elitë politikanësh serbë që nuk inkurajojnë lindshmërinë; pasi sa i përket “problemeve që kanë shqiptarët me politikanët e tyre”, ato janë po aq të mëdha sa në shumë vende të Ballkanit.
Deri më tani, ndër të vetmit që ka promovuar zbatimin e politikave në funksion të rritjes së lindshmërisë, është Edi Rama; por tek ky i fundit kanë munguar thirrjet e drejtpërdrejta alla Erdogan drejtuar çifteve për t’u shtuar minimalisht deri në 3 fëmijë, ndërkohë që stili qeverisës po i kushton shtimin e psikozës së “ikjes” nga Shqipëria.
Nga ana tjetër Vuçiç, në intervistën e tij ka vënë theksin tek e ardhmja e fatit serb në lidhje me Kosovën. Duke iu referuar nisjes së dialogut të brendshëm për braktisjen e Kosovës, Vuçiç tha se pret që të jetë i sulmuar, pa marrë parasysh se çfarë zgjidhjeje do të ofrojë ai, dhe tha gjithashtu se do të jetë i sulmuar nga ata që nuk kanë plane apo ndonjë politikë rreth kësaj çështjeje.
“Çfarëdo që do të sugjeroj, të gjithë do të më sulmojnë. Sigurisht që ata do të thonë ose nuk kam pasur kurajë të mjaftueshme, ose jam një tradhtar, varësisht nga zgjidhja që do të ofroj. Një pjesë thotë për Kosovën se nuk e kanë atë brengë, të tjerë thonë se ky është një vend i shenjtë serb, ose Kosova është Serbi, por këtu duhet të jemi serioz, pra duhet ta prezentojmë situatën reale ashtu siç është”, tha Vuçiç.
Ai njoftoi se do ta paraqesë qëndrimin e tij pasi të dëgjojë të gjitha palët, kurse në pyetjen nëse ai do ta bëjë këtë para zgjedhjeve, në rast se do të ketë zgjedhje të parakohshme parlamentare, Vuciç u përgjigj se kjo është një çështje dhe temë shumë më e madhe se të gjitha zgjedhjet.
“Nëse unë shoh se ekziston çfarëdo mënyre e mundshme për të ndërtuar një të ardhme më të mirë, unë do ta shtyj atë përpara si një buldozer. Për një gjë të tillë unë jam i përgatitur të sakrifikohem edhe politikisht”, theksoi Vuçiç. /tesheshi.com/
