Betimin e tij si president i ri i Serbisë, Aleksandër Vuçiç e ka përcjellë duke përfshirë në të dhe Kosovën.
Me dorë mbi Ungjill e Kushtetutë bashkë, kreu i ri i shtetit serb tha se do bënte gjithçka për ta mbajtur Kosovën si pjesë të Serbisë:
“Betohem se do të bëj çdo përpjekje për të ruajtur sovranitetin dhe integritetin territorial të Republikës së Serbisë, duke përfshirë Kosovën dhe Metohinë si pjesë të saj përbërëse, realizimin e të drejtave të njeriut dhe të pakicave. Do të garantoj të gjitha liritë që mbrohen nga Kushtetuta dhe ligji, do angazhohem për paqen, stabilitetin dhe mirëqenien e të gjithë qytetarëve të Republikës së Serbisë. Betohem!”.
Ka reaguar menjëherë i irrituar kreu i diplomacisë kosovare, Enver Hoxhaj. Me një gjuhë jo shumë diplomatike, Hoxhaj është shprehur: “Vuçic nuk është vetëm gënjeshtar, por ai gjithashtu po përçon sinjale negative për rajonin duke përdorur retorikën e njëjtë ndaj Kosovës”.
Vuçiç zëvëndëson në Tomislav Nikoliçin në postin e Presidentit, që duhet thënë se nuk ka shumë peshë kushtetuese në politikëbërje. Nikoliç mbahej si nacionalist i linjës së vjetër, ndërsa Vuçiç është i preferuari i perëndimit për t’ja ndryshuar kursin nacionalist dhe pro-rus Serbisë. /tesheshi.com/
