Presidenti i ri i Serbisë, Aleksandër Vuçiç ka përdorur portalin propagandistik të Kremlinit për të sulmuar Shtetet e Bashkuara të Amerikës dhe Bashkimin Europian, duke i akuzuar se çliruan Kosovën për të krijuar Shqipërinë e Madhe.
Vuçiç, në një intervistë “ekskluzive”, ka deklaruar për portalin rus “Sputnik” se të gjitha provat që William Walkeri nxori për masakrën e Raçakut nuk janë gjë tjetër veçse gënjeshtra dhe diplomati amerikan është lobisti më i madh amerikan për formimin ë Shqipërisë së Madhe.
Vuçiç nuk ka vonuar që të sulmonte ish-ambasadorin e OSBE-së në Kosovë në vitet e luftës si një njeri me mision të caktuar për të falsifikuar provat kundër Sllobodan Millosheviçit.
“Nuk e kishin me Sllobon, por kundër Serbisë”, tha Vuçiç në një intervistë të gjatë për portalin rus, vetëm pak ditë para instalimit të tij në presidencë.
Dhe këtë instalim, Vuçiç e bën në mënyrën më të frikshme të mundshme, duke rrëzuar të gjithë genocidin serb ndaj shqiptarëve të Kosovës, duke deklaruar se Serbia po mbledh prova për të kundërshtuar Raçakun, Krushën e Madhe, Krushën e Vogël dhe të gjithë golgotën ku egërsirat e Millosheviçit, siç deklaruan edhe vetë, zien kokat e shqiptarëve për t’u marrë dhëmbët.
“E gjithë bota tani ka prova për të korrigjuar atë që ka trilluar William Walker”, tha Vuçiç, por nuk tha se kush është kjo botë, se më poshtë e pranon se të gjithë i ka kundër.
“Ata janë ende së bashku. Shumë më fort se unë. Jam krenar për faktin se tashmë është e qartë për të gjithë në botë anën e të cilit kishte. Mos harroni, nuk ka asgjë më të rëndësishme se kaq”, tha Vuçiç, i cili bëri të ditur se ka një komplot SHBA-BE për Shqipërinë e Madhe.
“Lajmi më i rëndësishëm i ditës është pikërisht deklarata e Walker-it që tha se do të bashkohen të gjithë shqiptarët.
Ai tha se projekti duhet të ketë një plan për bashkimin e Shqipërisë, Kosovës dhe të ashtuquajturës diasporë shqiptare. Kështu, de facto, ka një plan për të krijuar një “Shqipëri të Madhe”, tha Vuçiç në intervistën ekskluzive për Sputnik jo pa qëllim, por për të dhënë një mesazh nga Moska për presidencën e re.
“Mos harroni, “rasti Raçaku” ishte i sajuar. Pas kësaj Millosheviç dhe Milan Milutinoviç u akuzuan, por doli se nuk kishin asnjë përgjegjësi.
Ky është ai njeri që ka kryer agresion ndaj Republikës së Serbisë”, tha Vuçiç.
/tesheshi.com/
