Autoritetet greke kanë provokuar një ndër situatat më të rënda në vite në kufi, më saktë në Kakavijë, ku radha e automjteve për të kaluar në tokën greke ka kaluar afro 10 km, duke mbërritur deri në Jorgucat, aty ku ndan rruga për Sarandë.
Kjo, pasi pala greke ka diktuar një proces testesh COVID për çdo person, një praktikë që ka dështuar të jetë efikase në përballimin e fluksit. Ky i fundit ka ardhur nga fakti se ka një dyndje drejt tokës greke të të gjithë atyre që punojnë e jetojnë në fqinjin jugor, pas më datë 16, Greqia vendos karantinën e detyrueshme për çdo person që hyn në territorin e saj.
Sakaq, irritimit të atyre qindra shqiptarëve në radhë, Tirana zyrtare i është përgjigjur me një deklaratë të ministrit Lleshaj.
“Procedurat e reja të testimit për Covid-19 në kufirin shqiptaro-grek kanë krijuar radhë të gjata bashkë me problemet e pashmangshme shoqëruese. Policia e Shtetit është angazhuar maksimalisht për të menaxhuar situatën e vështirë të krijuar.
Në bashkëpunim me Ministrinë për Europën dhe Punët e Jashtme po bëhen përpjekje për të kërkuar para autoriteteve greke gjetjen e mundësive për përshpejtimin e procedurave të testimit dhe reduktimin e kohës së pritjes në kufi. Ministria e Brendshme u bën thirrje qytetareve që të informohen për gjendjen në Pikat e Kalimit Kufitar me Greqinë përpara se të ndërmarrin udhëtim drejt tyre, me qëllim që të shmangen sa të jetë e mundur pritjet e gjata në kushtet e temperaturave të larta”, tha kreu i Rendit.
Situata e krijuar ngjan të ketë dhe sfond politik, pasi prej kohësh ka fërkime mes Athinës e Tiranës, që nga rasti “Kacifas”. Si për koiçidencë, e gjithë ajo vuajtje shqiptarësh nga Kakavija deri në Jurgucat, që është dhe zonë minoritare – Dropulli i poshtëm – ku ndodhet edhe Bularati i Kacifasit, ndodh pikërisht para mallkuesve të qeverisë shqiptare nga ana elementit grek, për rastin e ekzekutimit të Kacifasit.
Por Tirana zyrtare mohon të ketë një hakmarrje greke në këtë rast. Zv/ministri i Jashtëm Agron Tare, tha se kjo ndodh kudo në këtë krizë pandemike.
Në këto momente është hapur kufiri dhe po kalojnë qytetarë, pasi ishte bllokuar. Kjo situatë është në të gjithë botën, janë kushte të sigurisë, jo se grekët kanë bllokuar. Ministria e Brendshme greke është në debat me Ministrinë tonë të Brendshme për të lehtësuar kalimin e udhëtarëve në Kakavijë. Deri tani ka qenë e bllokuar pasi mjekët grek kanë pasur probleme logjistike dhe materiale, nuk kanë pasur tamponë. Tani do hapet, do kalojnë me tampon. Po diskutohet që të hiqet tampon…”, tha Tare për A1 Report.
Nga ana tjetër, Ministria e Jashtme njofton se nga bisedimet me palën greke, u arrit dakortësia që testet të bëhen në Shqipëri për të gjithë ata që duan të kalojnë në tokën greke.
“Është realizuar takim me drejtues të palës greke dhe theksojmë se problemi në lëvizje nuk krijohet nga autoritetet policore greke apo ato doganore, por nga autoritetet shëndetësore në Pikën e Kalimit Kufitar të palës greke. Teksa në Pikën e Kalimit Kufitar Kapshticë, puna vijon normalisht.
Në Pika Kufitare të tjera, pala Greke nuk kryen procedura hyrje/dalje, për mjete dhe shtetas, por procedon vetëm raste urgjente.
Për sa më sipër, rikujtojme se prej datës 17 Gusht 2020, hyrja në greqi do të lejohet vetëm me rezultatin e testit negativ të covid-19, i cili do të kryhet në Shqipëri”, thuhet në deklaratë. /tesheshi.com/
