Edhe pse VRMO-DPMNE thekson se protesta e zhvilluar mbrëmë përpara Gjykatës Penale në Shkup u zhvillua spontane, mediat maqedonase theksojnë se njerëzit u organizuan nga partia e Gruevskit.
Sipas Makfax, që i referohet Ministrisë së Brendshme të Maqedonisë, në protestë ishin përafërsisht 300 persona dhe nuk pati ndonjë incident.
Protestuesit ishin thuajse të gjithë të punësuar në administratë dhe njerëz të lidhur me strukturat e VRMO- së.
Ata kundërshtuan akuzat e ngritura nga Prokuroria Speciale kundër ish-kryeministrit Nikolla Gruevski.
Prokuroria Speciale dorëzoi 17 aktakuza, shoqëruar me kërkesën për veprime paraprake dhe masa ndalimi për një sërë anëtarësh të lidershipit të kësaj partie, përfshirë vetë Gruevskin.
Gjykatësit tani duhet të dalin me një vendim brenda 24 orësh ddhe protesta e VRMO-sw konsiderohet si një presion ndaj drejtësisë.
Makfax bëntë të ditura se organet e policisë së Maqedonisë i druhen një proteste të dhunshme si në rastin e 17 prillit, nëse gjykata vendos paraburgim për Gruevskin.
Në një deklaratë të saj, LSDM-ja e Zoran Zaev shprehet se “qytetarët patën mundësinë të dëgjojnë, shohin dhe ndjejnë sundimin kriminal dhe antishtetëror të Gruevksit e VMRO-së.
Kjo parti u pasurua në kurriz të varfërimit të shtetasve të shtypur të këtij vendi. Tani, drejtuesit e saj përballen me përgjegjësinë e veprave të tyre. Ata duhet t’i japin fund përpjekjeve për të shmangur drejtësinë e për ta vendosur veten mbi ligjin”. /tesheshi.com/
