Një efektiv policor humbi jetën nën uniformën e punës, duke shkuar të marrë turnin, qëlluar pas një konflikti çasti. Ngjarja ndodhi mesditën e kësaj të hëne në Baltëz të Fierit, afër Spitalit Memorial.
Sipas njoftimit të Policisë së Fierit, ngjarja ka ndodhur rreth orës 13:15 minuta, ku shtetasi Azgan Mërnica ka vrarë me armë zjarri shtetasin Novruz Cenalia, 28 vjeç, efektiv “Shqiponja”-ve të Fierit, jashtë shërbimi, por i veshur me uniformën e Policisë, pasi shkonte për të marrë shërbimin”. Pas ngjarjes, 23-vjeçari Mërnica është larguar me automjet nga vendi ku kreu vrasjen.
Kreu i Policisë së Fierit Lorenc Panganika, i ka bërë thirrje autorit që të vetëdorëzohet.
Sipas tij. në rast se ai nuk të vetëdorëzohet, reagimi i Policisë do të jetë i ashpër.
“I bëj thirrje autorit dhe familjarëve të dorëzohet pasi reagimi do jetë shumë i ashpër. Jemi duke kërkuar me informacione, tratativa etj. Pista kryesore është motive çasti, jo probleme hasmërie. Makina e autorit është gjetur. Ka qenë një konflikt i çastit. Jo s’ka lidhje me hakmarrjen, të paktën deri tani që flasim”, tha Panganika duke iu përgjigjur medieve.
Sakaq, Policia ofron 30 mijë euro shpërblim për këdo që jep informacion në lidhje me 23-vjeçarin Azgan Mërnica.
Kjo jetëmarrje e një polici nga krimi ordinder i rrugës vjen në një kohë kur jetëhumbja e uniformave blu si pasojë e detyrës pothuajse ishte harruar. /tesheshi.com/
