Policia ka vënë në pranga mëngjesin e ditës së sotme një nga autorët e dyshuar të vrasjes me tre viktima në Thumanë.
Burime nga policia bëjnë me dije se në pranga ka rënë babai i dy autorëve, 56-vjeçari Guri Kora. Ai është arrestuar në qytetin e Lezhës.
Tre djemtë e Guri Korës, Pëllumb, Daniel dhe Besnik Kora janë shpallur në kërkim, ndërsa dyshohet se janë autorët e vrasjes së trefishtë në Thumanë të Krujës.
Ditën e djeshme, policia ka vënë në shërbim shumën prëj 10 mijë euro si shpërblim, për të gjithë ata qytetarë që mund të japin informacion apo që kanë të dhëna në lidhje me vendndodhjen e autorëve.
NGJARJA
Tre pjesëtarë të një familjeje në Thumanë të Krujës janë ekzekutuar 100 metra larg banesës së tyre, ndërsa një tjetër është plagosur rëndë. Ngjarja e rëndë ku humbën jetën 79-vjeçari Fran Çeku, djali i tij 44vjeçar, Arben Çeku dhe nipi i tyre 20vjeçar, Eno Rama ndodhi pak para mesnatës së të premtes.
Burime zyrtare nga Drejtoria e Policisë së Qarkut të Durrësit dhe ajo lokale bënë me dije se në këtë ngjarje ka mbetur e plagosur rëndë dhe bashkëshortja 66vjeçare e Franit, Luçie Çeku.
Pas kryerjes së veprimeve hetimore ka rezultuar se masakra në familjen Çeku ka marrë shkas nga një sherr banal, i cili nuk kishte lidhje të drejtpërdrejtë mes autorëve dhe viktimave. Ndërkohë, janë shpallur në kërkim vëllezërit Daniel, Pëllumb e Besnik Kora, pasi dyshohen të jenë autorë të kësaj ngjarjeje. /tesheshi.com/
