Numri i vrasjeve në Shtetet e Bashkuara u rrit me rreth 30 për qind në vitin 2020 në krahasim me vitin e kaluar dhe u ngjit në 21.500, tha Byroja Federale e Hetimeve (FBI).
Një numër i qyteteve të mëdha amerikane raportuan një rritje të vrasjeve vitin e kaluar, por të dhënat e FBI japin fotografinë e parë në nivel federal.
Kjo është rritja më e madhe e vrasjeve që kur FBI filloi mbledhjen e të dhënave në vitet 1960, por totali është akoma më i vogël se sa ishte në vitet 1980.
Numri i vrasjeve u rrit ndjeshëm në qershor të vitit të kaluar, dhe megjithëse asnjë pjesë e Shteteve të Bashkuara nuk u kursye, shteti jugor i Luizianës ende kishte shkallën më të lartë të vrasjeve në vend.
Një raport i FBI thotë se 77 përqind e vrasjeve në vitin 2020 janë kryer me armë zjarri, dhe një vit më parë, 74 përqind.
Ekspertët nuk dhanë një shpjegim të qartë për rritjen e numrit të vrasjeve vitin e kaluar, por vunë re pasojat destabilizuese të pandemisë COVID dhe rritjen e shitjeve të armëve të zjarrit.
FBI thotë se mblodhi të dhëna nga 16,000 agjenci federale, shtetërore, të qarkut, të qytetit dhe të universitetit.
FBI nuk ka publikuar ende statistika për vitin 2021, por të dhënat nga disa qytete të mëdha tregojnë se shkalla e vrasjeve nuk po bie.
Të dhënat e Bankës Botërore tregojnë se në Shtetet e Bashkuara në 2018, patën 6.5 vrasje për 100,000 banorë, në Meksikë 35, në Brazil 27, në Rusi 8 dhe një për 100,000 në Francë dhe Gjermani. /tesheshi.com/
