Ministri i Brendshëm gjerman Horst Seehofer tha se krimi në Hanau ishte një sulm terrorist i motivuar qartë si racist.
Ai tha se ishte sulmi i tretë terrorist i krahut të djathtë në vetëm disa muaj.
“Rreziku i ekstremizmit të krahut të djathtë, antisemitizmit dhe racizmit në Gjermani është shumë i lartë,” vuri në dukje Seehofer.
Ai njoftoi masa të reja për të mbrojtur popullsinë nga krimet e urrejtjes.
Seehofer njoftoi një prezencë të shtuar të policisë para xhamive pas sulmit ndaj bareve të nargjileve në Hanau.
Policia federale do të mbështesë oficerët krahinorë të zbatimit të ligjit, shtoi ai.
Ai gjithashtu njoftoi një prani më të madhe të policisë në stacionet e trenave, aeroportet dhe zonat kufitare.
Nëntë njerëz u vranë në dy bare nargjile në qytetin gjerman të Hanau natën e së mërkurës.
Autoritetet gjermane kanë thënë se sulmuesi ishte një gjerman 43-vjeçar dhe tregoi se bëhej fjalë për një sulm të frymëzuar nga ideologjia e ekstremit të djathtë.
I dyshuari u gjet më vonë i vdekur në shtëpinë e tij, 25 kilometra larg Frankfurtit.
Prokurorët federalë gjermanë thanë se kishte indikacione se sulmuesi, i identifikuar nga media si 48-vjeçari Tobias S., kishte një motiv ekstrem të krahut të djathtë.
Politikanët gjermanë në reagimet fillestare shprehën tronditje dhe trishtim .
“Racizmi është helm. Urrejtja është helm. Dhe ky helm është përhapur në të gjithë shoqërinë tonë dhe bart fajin për shumë krime,” tha kancelarja gjermane Angela Merkel, duke iu përgjigjur masakrës, duke shtuar se ishte një “ditë e trishtuar për Gjermaninë”. /tesheshi.com/
