Nga Blendi Gashi
Deputeti i LDK-së, Ismet Beqiri në seancën e djeshme ku debatohej për vdekjen e aktitivistit të VV-së Astrit Dehari, ndërsa akuzoi këtë lëvizje se po përfiton poena politik, të njëjtën gjë bëri vet më pas.
Ai shfrytëzoi këtë seancë të flas edhe për mos zbardhjen e vrasjeve të zyrtarëve të lartë të LDK-së dhe atentatit ndaj Rugovës.
Ai tha se partia e tij ka kërkuar që për shumë raste të ndodhura ndër vite që çdo vrasje apo edhe vetëvrasje për çdo humbje jete të veprimtarëve të LDK-së, që e vërteta të dihet për të gjithë jetët e humbura.
“Ne kemi të drejtë të dimë dhe obligim e kanë organet në mënyrë që të hiqet nga dora vullneti i njerëzve për të keqpërdorur këtë. Ne kërkojmë dhe duam me ditë se kush ka tentu me vra Ibrahim Rugovën dhe shumë të tjerë por këtë e kërkojmë nga organet e rendit. Kemi të drejtë të dimë kush po sulmon edhe eskordën e kryeministrit, kush po i sulmon institucionet s’ka rëndësi i cilës parti dikush po i sulmon, apo kush po i sulmon makinat pasi unë dyshoj se po i bënë dikush nga partitë politike por nuk jam ekspert dhe kam të drejtë me dyshu”, deklaroi Beqiri.
Përmes kësaj deklarate ai jo vetëm që u mundua të përfitoi politikisht, dhe të bëj aktorin kinse po interesohet për vrasjet e pasluftës, por në të njëjtën kohë tregoi mosguximin e partisë së tij që të kërkoi seancë kur do të diskutoheshin vrasjet e pasluftës.
Shtrohet pyetja; kush po e pengon LDK-në që tashmë është në pushtet të zbardh atentatin ndaj Rugovës por edhe të hetoi e burgos njerëzit që shkaktuan vrasjen e shumë bashkëpartiakëve.
Është pikërisht Beqiri dhe disa koleg të tij që nuk janë të gatshëm tëjapin nënshkrimin për hetimin e SHIK-ut organizatë kjo që është drejtuar nga Kadri Veseli, që shumë deputet të LDK-së kanë drejtuar gishtin drejt saj për vrasjet e bashkëpartiakëve.
Por, sigurisht që Isa Mustafa që erdhi në karrigen e kryeminsitrit pikërisht duke sharë SHIK-un por edhe Beqiri e shumë figura të tjera tashmë janë rehatuar në karriget e pushtetit që ia sjellin shumë të mira material dhe aspak nuk iu konvenon të ngrejnë zërin për vrasjet e zyrtarëve të tyre.
Andaj, Beqiri në vend të shfrytëzimit të rastit në seancën për “Deharin” të shpreh pakënaqësinë me drejtësinë për zbardhjen e vrasjeve të zyrtarëve të LDK-së, duhet të ketë guximin të thirr një sencë plenare që të debatohet ekskluzivisht për këtë rast.
Në këtë seancë do të kishin mundësi të gjithë deputetët e LDK-së, disa prej të cilëve edhe u janë vrarë baballarët pasluftës në mënyrë enigmatike të ngritin zërin publikisht ndaj drejtësisë për mos zbardhjen e vrasjeve edhe pas 17 vjetësh dhe njëherit të kërkojnë llogari nga Kadri Veseli që e kanë akuzuar jo pak për këto vrasje.
Por, sigurisht që këtë gjë nuk pritet të bëjnë, sepse nuk kanë guximin ta thërrasin seancë të paktën jo sa janë në pushtet sepse humbin privilegjet.
Aq më pak ka të drejtë tashmë LDK të bëj viktimën kur drejton qeverinë dhe ka rastin që njëherë e mirë ta përmbyll kapitllin e vrasjeve të zyrtarëve të saj.
Poashtu s’ka të drejtë të hedh kritika as ndaj sistemit të drejtësisë sepse po vet LDK në bashkëpunim me PDK-në me apo pa qëllim e kanë sjell në komë këtë sistem.
Andaj, Beqiri me vajtimin e tij nuk ka bërë gjë tjetër vetëm se është munduar të dal para elektoratit të partisë, pse jo edhe familjarëve të zyrtarëve të vrarë, kinse ja edhe LDK po kërkon drejtësi.
Megjithatë, LDK dhe krerët e saj duhet ta kenë të qartë se nuk mund të përfitojnë vota duke u thirrur në presidentin Rugova dhe në emrat e zyrtarëve të ndjerë të saj.
Elektorati i saj nuk do ta falë nëse LDK nuk punon ditë e natë për zbardhjen e vrasjeve të pasluftës, por i përmend ato vetëm kur i nevoitet të bëj viktimën. /tesheshi.com/
