Kreu i Policisë shqiptare Muhamet Rrumbullaku publikoi detaje të megaoperacionit të shtrirë në disa qytete të vendit, për zbatimin e 15 urdhërarresteve të lëshuara nga gjykata, për pjesëtarët e një grupi vrasësish me pagesë të përfshirë në disa ngjarje të rënda kriminale.
Arrestimet u kryen në Elbasan, Berat dhe Lushnjë dhe kanë ardhur pas bashkëpunimit të penduarit të drejtësisë, Artan Tafani, me autoritetet.
“U zbardhën gjashtë vrasje, pesë raste të shkatërrimit të pronës me eksploziv, tre raste të vjedhjes së pronës
me dhunë, tre raste të sigurimit të kushteve për vrasje, kanosje ndaj punonjësve të policisë dhe dy vrasje të ndodhura në Greqi. Nga ky megaoperacioni, Prokuroria ka lëshuar 15 urdhër ndalimi, nga të cilat janë ekzekutuar 12 ndërsa tre shtetas janë shpallur në kërkim”, tha Rrumbullaku.
Ndër ngjarjet e të tjera kriminale të zbuluara, si pasojë e hapjes gojë të të penduarit Artan Tafani nga Elbasani, është dhe një tritol te një lokal i Noyzi-t.
Ndër krimet e tjera veçohet dhe ajo e vrasjes së Çajup Selimit në Tepelenë në qershor 2021.
Këto e të tjera krime kanë si kryemër Laert Haxhiun nga Lushnja, prej kohës i arrestuar në Greqi, pasi pothuajse të gjitha i dedikohen atij.
I pyetur si do të ekstradohet ai në Shqipëri, Rrumbullaku u përgjigj se janë në bisedime me zyrën e Interpolit dhe shprehu besimin se sot ia arrijnë qëllimit.
“Jemi në komunikim të vazhdueshëm me zyrën e Interpolit dhe kemi besim se do t’ia arrijmë, pavarësisht problematikave ligjore që kemi përpara”, u përgjigj Rrumbullaku.
“Ai është dhe organizatori dhe porositësi i vrasjes në Athinë të Lulzim Qorrit dhe Dikens Halili. Të dhënat do i çohen autoriteteve në Athinë”, tha kryepolici shqiptar. /tesheshi.com/
