Lideri i Koresë së Veriut, Kim Jong Un dhe 10 zyrtarë të tjerë të këtij shteti akuzohen për abuzime të rënda me të drejtat e njeriut. Akuza vjen nga Shtetet e Bashkuara të Amerikës, të cilat kanë vendosur sanksione ndaj Jong Un dhe zyrtarëve të tjerë.
Lajmi është bërë i ditur nga Departamenti i Thesarit, çka shënon edhe përpjekjen e fundit për të shtuar presionin ndaj këtij regjimi. Ende nuk është e qartë se çfarë pritet të arrihet konkretisht me këto sanksione.
Vendimi është marrë pas publikimit të një raporti të Departamentit të Shtetit ku Kim akuzohet se është përfshirë në vrasje pa vendime gjyqësore, punë të detyruar dhe tortura.
Shtetet e Bashkuara iu kanë vendosur sanksioneve edhe liderëve të shteteve të tjera në të kaluarën, përfshirë presidentin e Bellorusisë, Aleksander Llukashenka dhe presidentin e Sirisë, Bashar al Assad. /tesheshi.com/
