50 njerëz janë vrarë gjatë të shtënave në një lokal nate të komunitetit gay në Orlando, Florida, ku edhe është shpallur “gjendje emergjente”, ka njoftuar kryebashkiaku i qytetit Buddy Dyer.
Vrasësi, i identifikuar nga zyrtarët si Omar Mateen, gjithashtu është qëlluar për vdekje.
Sulmi me gjasë ka qenë i organizuar dhe i përgatitur relativisht mirë, sipas zyrtarëve të policisë lokale.
Edhe 53 njerëz tjerë janë lënduar gjatë të shtënave në klubin Pulse.
Këto janë të shtënat masive më të rënda në historinë e re të SHBA. Policia e ka përshkruar sulmin si akt terrorist.
Zyrtarët thonë se vrasjet me gjasë janë të motivuara ideologjikisht, edhe pse nuk është dhënë ndonjë informatë se a ka qenë i lidhur atentatori me ndonjë grup të caktuar.
Kongresmeni Alan Grayson ka thënë se sulmi në klubin e komunitetit gay nuk ishte fare koincidencë.
Besohet se i dyshuari vjen nga qyteti i Port St Lucie dhe është me prejardhje afgane. Sipas informative ai nuk ka qenë kurrë në listën e të dyshuarve për terrorizëm.
Familjarët janë tubuar në spital në mënyrë që të marrin sa më shpejtë lajmet për të afërmit e tyre.
Shumë prej tyre kanë pranuar thirrje dhe mesazhe nga të dashurit e tyre nga lokali me të filluar rrethimi, ndërsa të tjerë nuk kanë dëgjuar nga ta asgjë që atëherë. /tesheshi.com/
