Fatos Bytyçi, i vëllai i tre vëllezërve të vrarë në vitin 1999 në Serbi thotë se familja e tij këmbëngul që dëshmitë e reja të hetimeve për këtë krim, t’i dërgohen agjencisë amerikane, FBI.
“Kërkojmë që secili përparim ose provë të ndahet menjëherë me FBI-në, në vend se të plasohet me anë të mediave ose politikanëve”, tha Fatos Bytyçi për të përditshmen Danas në Beograd.
As ai nuk e di se për cilat prova të reja bëhet fjalë, por thotë se zbulimi i tyre e ka aktualizuar çështjen se kush dhe përse i ka fshehur.
“Autoritetet e Serbisë kanë pritur me muaj, para se t’i ndajnë me FBI-në provat që kanë. Për këtë arsye insistojmë në zbulimin e plotë dhe të menjëhershëm te agjencia FBI e çfarëdo provave të reja ose të përparimit të realizuar”, tha Bytyçi.
Gjithsesi, sipas tij, çështja kryesore në këtë rast, është mungesa e dëshmitaarëve. “Shumë dëshmitarë nuk u besojnë organeve shtetërore. Ka pasur shumë rrjedhje të informacioneve, kërcënime ose frikësime që i kanë dekurajuar dëshmitarët. Porosia jonë është – nëse u besoni organeve shtetërore, tash është koha e duhur për t’u paraqitur. Nëse nuk keni besim në pushtetin shtetëror, na kontaktoni neve”, tha Fatos Bytyçi.
Shtetasit amerikanë, vëllezërit Agron, Ylli dhe Mehmet Bytyçi, kishin ardhur në Kosovë nga Nju Jorku, në vitin 1999 për t’u bashkuar me Ushtrinë Çlirimtare të Kosovës.
Ata e kaluan kufirin në Serbinë qendrore ku u zunë dhe u vranë. Trupat e pajetë të vëllezërve Bytyçi u zbuluan në vitin 2001 në një varrezë masive në Petrovo Sello në Serbi./tesheshi.com/
