Policia e Shkodrës po heton në dy pista për vrasjen e vëllait të ish-deputetes Mirela Ferracaku, të ndjerin Arjan Ferracaku. Njëra është ajo e konkurrencës dhe për ndonjë gjobë të papaguar nga viktima ndaj grupeve kriminale.
Megjithatë, ekziston edhe një version sipas të cilit Ferracaku është vrarë gabimisht, pasi është kujtuar si një person tjetër.
Familja e të ndjerit njihet në Shkodër si pronare e kompanisë së prodhimit të plastikës “Firma Ferracaku”, ndërsa kishte dhe disa biznese në Velipojë.
Ferracaku ka qenë në konflikt para një viti me një biznesmen fqinj për hotel-restorant “Fantazia” që ndodhet në Zus, sapo kalon Urën e Bunës.
Në lidhje me këtë konflikt, të dyja palët kanë shkuar edhe në polici.
Vrasja e 31-vjecarit ndodhi dje rreth mesditës në zonën e Livadhes, pranë fshatit Dobraç. Biznesmeni ishte adhurues i kuajve dhe është qëlluar disa herë me armë teksa kishte hipur sipër kalit, i cili gjithashtu ka marrë dy plumba.
Policia ka shoqëruar deri më tani 10 persona të cilët po merren në pyetje.
Familja Ferracaku është pjesë e një fisi të njohur në zonën e Nënshkodrës dhe ka emër të mirë.
Motra e të ndjerit, Mirela Ferracaku ka qenë deputete në legjislaturën e kaluar, ku zëvendësoi Mark Frrokun pasi ky i fundit u arrestua. /tesheshi.com/
