Vrasja e dy turistëve çekë në Shqipëri mbrëmjen e djeshme, në zonën e Dukagjinit të Shkodrës ka prekur dhe ka bërë që mjaft shqiptarë të reagojnë në lidhje me këtë ngjarje
Është një histori e cila po përsëritet, pasi 27-vjeçari Mihail Zvatos dhe 36-vjeçarja Anna Kosinova nuk janë të parët turistë që po vriten apo po humbin jetën në Shqipëri, ndërsa dëgjojnë për bukuritë dhe veçantinë e këtij vendi me natyrë të virgjër dhe largohen prej këtej në arkivol apo me trupin të copëtuar.
Legjenda thotë për shqiptarët se janë popuj të besës dhe mikpritës, por a është kjo besa e mikpritja e shqiptarit? Mos vallë gjërat kanë ndryshuar dhe tani ne të presim në besë?
Këtë nuk arrijnë të kuptojnë mjaft shqiptarë pas një ngjarje të kobshme si ajo e djeshmja dhe reagimet nga qytetarët e thjeshtë, por edhe nga plotë figura publike janë të shumta.
“ ‘Shkodër, vriten me kallashnikov dy turistë çekë’. Dhe të mendosh që në shkollë mësojmë që ndër vlerat kryesore të popullit shqiptar është Mikpritja. ( ?!) O sa turp me qenë shqiptar”,- shkruan menjëherë pasi në media u njoftua vrasja e turistëve, Fjori Sinoruka, një studente në Universitetin e Tiranës.
Një reagim tjetër që bën përshtypje është edhe ai i qytetares nga Vlora, Sevina Gjokoli, e cila drejton gishtin tek qeveria për këtë rast.
“Sa bukur dalin pushtetarët e bëjnë thirrje e harxhojnë me mijëra lekë për spote publicitare për të ftuar turistët të vizitojnë Shqipërinë. Sot ama nuk doli askush të kërkojë falje për 2 turistët çek. Si shqiptarë sot unë u kërkoj falje që i premë në besë. Turpi na përket të gjithëve dhe për fat të keq është turp që s’do mund të lahet dot”,- shkruan qytetarja nga Vlora.
Nuk kanë qenë të pakta edhe reagimet e disa figurave publike, që në çdo rast nuk kanë të bëjnë me politikën, por me fushën e medias, artit, kulturës, opinionbërës etj, të cilët turpërohen nga ky veprim dhe i dënojnë autorët me nota të ashpra.
Në postimet e fundit në rrjetet sociale, shqiptarët shprehen të hidhëruar, por vijojnë ti mëshojnë faktit se nuk mund të përlyhet emri i gjithë popullsisë, prej veprimeve makabre dhe jashtë çdo logjike të një apo dy personave.
Çifti Mihail dhe Anna kishin postuar në profilet e tyre në rrjetet sociale fotografi të shumta të realizuara gjatë udhëtimit në Shqipëri, e mes tyre, edhe flamurin shqiptar.
Turistët çekë që kanë humbur jetën në Shqipëri në 2 vitet e fundit
1 Qershor 2014- turisti çek David Polack vdes në Dukagjin pasi makina e tij bie aksidentalisht në greminë
15 gusht 2014 -turistja çeke 26 vjeçare Martina Mala plagoset në një lokal në plazhin e Velipojës. Policia arrestoi personin që qëlloi, S.H., nga Draxhati i Shkodrës
8 Maj 2015 – Turisti çek Adama Baron 26 vjeç mbytët në lumin Kir, teksa bënte rafting. Trupi nxirret nga forcat RENEA.
3 Korrik 2015 -një çift çek vriten më kallashnikov pasi u grabitën në Prekal të Dukagjinit
Ngjarja tragjike e 2001
Nuk duhet harruar as historia tragjike e zhdukjes së tre studentëve çekë në vjeshtën e vitit 2001 në Shqipëri.
Mihal Pavelka, Jan Pavelka dhe Lenka Tuçkova, u zhdukën në zonën malore të Dukagjinit, vjeshtën e vitit 2001.
Ende sot e kësaj dite nuk ka asnjë informacion në lidhje me fatin e tyre./tesheshi.com/
