Vrasja e studentit dhe e hulumtuesit italian Giulio Regeni në kryeqytetin e Egjiptit dy muaj më parë vazhdon t’i tensionojë më tej marrëdhëniet mes dy vendeve.
Takimet e përbashkëta në Romë gjatë dy ditëve të shkuara mes hetuesve dhe prokurorëve italianë e egjiptianë nuk kanë dhënë asnjë rezultat, duke e lënë ende pa një zgjidhje të kënaqshme misterin e vrasjes së 28-vjeçarit italian.
Në shenjë proteste, për shkak të mungesës së përparimit në hetimin e çështjes, siç dhe qe paralajmëruar më herët, Italia ka tërhequr ambasadorin e vet në Egjipt.
Paolo Gentiloni, ministri i Jashtëm italian, ka deklaruar se ambasadori Maurizio Massari është thirrur për konsultime, për “një vlerësim të ngutshëm të lëvizjeve më të mundshme për t’i përtërirë përpjekjet për të zbuluar të vërtetën e vrasjes barbare të Giulio Regeni-t”.
Ndërsa zyrtarët egjiptianë pretendojnë se i riu u torturua dhe u vra nga një bandë, italianët mendojnë ndryshe, duke e drejtuar gishtin te shërbimet egjiptiane të sigurisë. /tesheshi.com/
