Pas vrasjes së një imami dhe shoqëruesit të tij jashtë xhamisë në Queens, Nju Jork, të shtunën, amerikanët u zotuan se do të ecin krah për krah me fqinjët e tyre muslimanë.
Imami Maulama Akonjee, 55 vjeç, dhe shoqëruesi i tij Tharam Uddin, 64 vjeç, u qëlluan me armë zjarri jashtë xhamisë Al-Furqan Jame, pak momente pasi kishin falur namazin e drekës.
Policia ka thënë se nuk kanë gjetur akoma ndonjë motiv për vrasje, dhe nuk është e qartë nëse të dy viktimat kanë qenë në shënjestër për shkak të fesë së tyre.
Sidoqoftë, shumë amerikanë kanë shfrytëzuar rrjetet sociale për të dërguar një mesazh të fuqishëm të mbështetjes dhe kanë dale në mbrojtje të komunitetit musliman, duke përdorur hashtagun #IllWalkWithYou (Do të ecë me ty).
Ky mesazh i bën jehonë lëvizjes #IllRideWithYou që filloi në Australi, kur Man Haron Monis, një qytetar australian, refugjat i lindur në Iran, kishte marrë 18 njerëz peng në një kafeteri në Martin Place në Sidnej të Australisë, në fillim të vitit 2014. Rrethimi kishte përfunduar me 3 njerëz të vdekur, përfshirë vetë Monis.
Hashtagu #IllRideWithYou u bë i popullarizuar pasi një banor i periferisë në Sidnej, Rachel Jacobs e pa një grua myslimane duke hequr mbulesën pas tragjedisë. Jacobs iu afrua gruas myslimane, duke i ofruar asaj një mesazh mbështetjeje: “Mos, nëse dëshiron ta mbash mbulesën, atëherë mbaje. Unë do të ecë me ty”.
Vrasja e dy myslimanëve në Nju Jork, vjen në një kohë kur komuniteti musliman amerikan është në shënjestër të qarqeve islamofobe, në veçanti kandidatit republikan për president Donald Trump. Së fundi, ai sulmoi prindërit e ushtarit të vrarë musliman amerikan, Humayun Khan, pas fjalimit elektrizues të babait të tij, Khizr Khan në Konventën Kombëtare Demokratike, në korrik të këtij viti.
Trump reagoi duke thënë se nëna e tij, Ghazala Khan, nuk ishte lejuar të flasë me këtë rast, për shkak se ishte myslimane. Ky koment provokoi një fushatë në rrjetet sociale të udhëhequr nga gratë muslimane, me hashtagun #CanYouHearUsNow (A po na dëgjon tani?).
Gratë muslimane të profileve të ndryshme filluan të përdorin rrjetet sociale për të kundërshtuar mesazhin e Trump-it, me ç’rast njerëz të ngjyrave të ndryshme po e përdorin tashmë këtë hashtag për t’i treguar komunitetit musliman një anë ndryshe të Amerikës. /tesheshi.com/
