Shtetet e Bashkuara u kanë bërë thirrje qytetarëve amerikanë, pas vrasjes së gjeneralit të rangut të lartë iranian Qassem Soleimani në Bagdad, që “të largohen” menjëherë nga Iraku.
Një deklaratë e Departamentit të Shtetit tha se “tensionet janë rritur në Irak dhe rajon”, raporton AP.
“Për shkak të sulmit nga milicia e mbështetur nga Irani mbi kompleksin e Ambasadës së SHBA, të gjitha postet konsullore janë pezulluar. Qytetarët e SHBA-së nuk duhet të afrohen pranë ambasadës”, thuhet në deklaratë.
Në të njëjtën kohë, ambasada franceze në Teheran u bëri thirrje qytetarëve të saj në Iran që të qëndrojnë larg tubimeve publike.
Irani ka deklaruar tre ditë zi për vrasjen, dhe ambasada franceze u bën thirrje qytetarëve të saj në vend “të jenë të matur dhe të mos dalin në hapësirën publike”.
Ministria e Jashtme ruse tha që vrasja e gjeneralit iranian në një sulm të udhëhequr nga SHBA në Irak do të rezultojë në rritje të tensioneve në Lindjen e Mesme.
“Ne e konsiderojmë vrasjen e Soleimanit në një sulm raketash amerikane në periferi të Bagdadit një veprim aventuresk që do të çojë në rritje të tensioneve në të gjithë rajonin”, tha një burim për TASS.
Ai shtoi se Soleimani kishte shërbyer me besnikëri për të mbrojtur interesat kombëtare të Iranit dhe se Rusia i shprehu ngushëllime popullit iranian.
Kina, megjithatë, tha që vazhdimisht ka kundërshtuar përdorimin e forcës në marrëdhëniet ndërkombëtare dhe u bëri thirrje të gjitha palëve të frenohen.
Soleimani, drejtuesi i njësisë elitare Quds të Gardës Revolucionare Irani, është vrarë në një bombardim të aeroportit të Bagdadit, dhe Pentagoni ka konfirmuar që Presidenti Donald Trump ka urdhëruar likuidimin, thanë më herët agjensitë botërore. /tesheshi.com/
