Që nga data 31 janar, kur lajmi i kobshëm mori dhenë, në shtëpinë e Halil Demirajt, punonjësit të Bashkisë së Tropojës, dera rri e hapur duke pritur e përcjellë në çdo orë të ditës vizitorë të shumtë për ngushëllime për vdekjen tragjike të vajzës së tij, Elidonës, fëmijës së parë të 50-vjeçarit me profesion topograf, njeri i respektuar në punë, familje dhe shoqëri.
Vetëm 3 muaj kishte që ishte martuar dhe bashkuar me të shoqin e saj në Angli, tashmë e ndjera, Elidona 25-vjeçare.
Bashkëshorti i saj, Lulzim Qeleposhi, që banonte atje me dokumenta të rreme nën emrin Arben Rexha, e vrau me thikë vetëm 90 ditë më pas dhe siç u publikua në media, historia tragjike e nuses së re, u dokumentua thjesht si “vajza që refuzoi të dilte për kafe.”
Por, cila është e vërteta? Atë e shpjegon qartë babai i saj, Halili, jo vetëm në odën e shtëpisë burrave që i shkojnë për ngushëllim, por edhe në një mesazh publikuar së fundi në facebook duke iu drejtuar të gjithë miqve që iu bashkuan dhimbjes së tij.
Ndër të tjera ai shkruan se “me hidhërim të madh për vdekjen tragjike të vajzës tonë, Elidona Demiraj, por me një respekt e mirenjohje të thellë, falenderoj përzemërsisht të gjithë shokët, miqtë, gjithë shqiptarët brenda kufijve e në diasporë e shumë njerëz të kombeve të tjera. Në mënyrë të veçantë, familjarët komshi me vajzën time tre muajt e fundit të jetës së saj të shkurtër për dhimbjen e madhe që treguat, për ngushëllimet që i përcollët familjes sonë, për vdekjen tragjike të vajzës sonë të pafajshme. Për ata që s’e njohin, Elidona vjen nga një familje në fshatin Begaj të Tropojës. U arsimua në Tropojë, u diplomua në Universitetin “Luigj Gurakuqi” në Shkodër. U fejua në tetor të vitit 2013 me Lulzim Qeleposhin (Arben Rexha në Angli).
U martua para 3 muajsh kur e mori në Angli. Ky bashkëshort kriminel, që jo vetëm i privoi dashurinë dhe lumturinë, buzëqeshjen e saj të ëmbël që për 25 vite nuk iu largua asnjë çast nga fytyra e saj, i privoi, i mohoi e i mori edhe atë që ia fali Zoti, jetën në kulmin e rinisë së saj.Uroj që rasti i vajzës time të mos i trokasë në derë askujt dhe askund”, përfundon Halil Demiraj mesazhin e tij prekës për vdekjen tragjike të bijës së tij të pafajshme. Ky mesazh është edhe një apel për krimin në familje, i cili vitet e fundit ka marrë përmasa galopante.
Deputetja tropojane, Mimoza Hajdarmataj ka reaguar me dhimbje dhe e revoltuar për këtë ngjarje tragjike që ka shokuar familjen e Elidona Demirajt, ndërsa diapora shqiptare në Europë do organizojë tubime në mbështetje të integritetit të femrës shqiptare, duke sensibilizuar opinionin dhe ligjvënësit shqiptarë për të marrë nisma ligjore në mbrojtje të personalitetit të saj.
Dy familjet janë afër njëra me tjetrën, jo më shumë se 30 minuta, Sopoti me Begajt. Edhe familja e vrasësit, është e shokuar për këtë ngjarje tragjike, ku djali i tyre i vetëm vrau ish-bashkëshorten e tij.
Përgatiti: Gjon Neçaj – /tesheshi.com/
