Lideri suprem i Iranit, Ajatollah Ali Khamenei, u zotua për hakmarrje për vrasjen e shkencëtarit bërthamor iranian Mohsen Fakhrizadeh, duke shtuar se puna e tij për zhvillimin e energjisë bërthamore do të vazhdonte.
Presidenti iranian Hassan Rouhani akuzoi Izraelin për vrasjen e Fakhrizadeh, për të cilin Perëndimi beson se ishte krijuesi i programit sekret ushtarak bërthamor të Iranit.
Udhëheqësit fetarë dhe ushtarakë iranianë kanë kërcënuar me hakmarrje, gjë e cila mund të përshkallëzojë më tej tensionet në Lindjen e Mesme dhe më gjerë.
“Njerëzit tanë janë më të mençur sesa të bien në grackën e regjimit Sionist (Izrael). Irani me siguri do t’i përgjigjet martirizimit të shkencëtarit tonë në kohën e duhur,” tha Rouhani gjatë një takimi qeveritar të transmetuar në televizionin shtetëror.
“Edhe një herë, duart e liga të arrogancës globale dhe mercenarëve sionistë (izraelitë) janë njollosur me gjakun e birit iranian,” tha Rouhani në një njoftim për shtyp të lëshuar më parë gjatë ditës, duke shtuar se vdekja e Fakhrizadeh nuk do të ngadalësonte aktivitetet bërthamore të Iranit.
Shtëpia e Bardhë, Pentagoni, Departamenti i Shtetit dhe CIA nuk pranuan të komentojnë për vrasjen, ashtu si edhe ekipi i tranzicionit i Biden.
Të paktën katër shkencëtarë u vranë midis 2010 dhe 2012 në atë që Teherani e quan një program për të eleminuar shkencëtarët për të sabotuar programin e energjisë bërthamore të Iranit. Irani gjithmonë ka mohuar zhvillimin e armëve bërthamore. /tesheshi.com/
