Nëna e vrasësit të ish-presidentit japonez Shinzo Abe ishte anëtare e Kishës së Unifikimit, tha sot kreu i asaj kishe në Japoni.
Tetsuya Yamagami, një 41-vjeçar i papunë, u identifikua nga policia si njeriu që vrau Abe gjatë fjalimit të tij të fushatës në Nara të premten.
Yamagami besonte se ish-kryeministri po promovonte një grup fetar, të cilit nëna e tij i kishte bërë një “dhurim të madh”, raportoi agjencia e lajmeve Kyodo, duke cituar hetuesit. Vetë sulmuesi i tha policisë se nëna e tij falimentoi për shkak të donacionit, raportuan gazeta Yomiuri dhe media të tjera japoneze.
Tomihiro Tanaka, president i Federatës Japoneze të Familjes për Paqen dhe Bashkimin Botëror, e njohur si Kisha e Unifikimit, u tha gazetarëve në Tokio se nëna e Yamagamit ishte me të vërtetë një anëtare e kishës. Tanaka nuk pranoi të komentonte mbi donacionet e gruas, duke përmendur hetimin e policisë në vazhdim.
Policia ka konfirmuar se Yamagami ushqente ndjenja urrejtjeje kundër një organizate, të cilën autoritetet nuk e kanë përmendur.
As Abe dhe as vrasësi i tij nuk i përkasin kishës, vuri në dukje Tanaka, duke theksuar se ish-kryeministri japonez nuk kishte asnjë rol si këshilltar i kishës. /tesheshi.com/
