Dy persona janë arrestuar si të dyshuar për vrasjen e 16-vjeçarit në Prishtinë. Të arrestuarit, një mashkull dhe një femër, që të dy të mitur, janë dërguar në qendrën e paraburgimit për 48 orë.
Motivet e vrasjes ende kanë mbetur të pazbardhura.
Xhaxhai i Aulonit, Misimi, është shprehur i habitur për vrasjen e nipit, duke thënë se ai asnjëherë nuk ka pasur probleme dhe se e gjithë lagjia dhe shokët e tij e kanë cilësuar si djalë të qetë.
“Auloni, sipas vëllait, të premten rreth orës 21:00 ka dalë nga shtëpia dhe nuk është kthyer më. Të nesërmen na kanë njoftuar që e kanë gjetur të vrarë në afërsi të Shkollës Model. As ne nuk kemi informacione, jemi në pritje të policisë”, ka pohuar Zeka për “Koha Ditore”.
Ai tha se familja nuk ka informacion se kush mund të jetë vrasësi, pasi nuk di të ketë pasur probleme më herët. “Me sa e dimë ne ai nuk ka pasur probleme, por edhe mund të ketë pasur, por ne nuk kemi informacione. Ndoshta shoqëria e keqe. Nuk po dimë as ne më shumë, nuk po di çfarë të them”, ka pohuar Zeka.
Auloni ka katër vjet që e ka lënë shkollën për shkak të problemeve shëndetësore dhe ndërhyrjeve kirurgjike. Ai vuante nga problemet me boshtin kurrizor dhe katër vjet më parë kishte pasur disa ndërhyrje kirurgjikale në Turqi.
“Auloni nuk ka qenë në shkollë, sepse ka qenë i sëmurë, e pas operacioneve nuk ka vijuar më shkollën”, ka treguar xhaxhai i tij.
Para se t’i dorëzohej trupi i pajetë familjes, ai është dërguar për ekspertizën në Institutin e Mjekësisë Ligjore.
Katër vjet më parë familja e Aulonit kishte kërkuar edhe ndihmë publike. Në një postim në “Facebook” në faqen “Kontribuo edhe ti”, ata kishin kërkuar mbështetje për operimin e Aulonit.
Auloni u gjet i vrarë paraditen e së shtunës në afërsi të Shkollës Model, në një rrugicë të ngushtë që të shpie te vendngrumbullimi i mbeturinave në lagjen “Arbëria”. /tesheshi.com/
